الباب مفتوح والطارف سداد

[الحميدي]

السلام عليكم ورحمة الله وبركاته
وكل عام وانتم بخير
ترى الباب مفتوح والطارف سداد
بسم الله


جيت ابارك لكم بحلول شهر الصيام=مرحبا والقوافي زان طاروقها
الحميدي ينادي في صلاة القيام=جيت افك القصيد الجزل عن طوقها

[الصييفي]

هلا بالحميدي:
عليكم السلام وكل عام و انت طيب
حياك الله
وينكم يا شباب جاوبوا الرجال.
مع دخول العشر، يمكن يكون الإقبال متدني،

على أي حال مرحبا بك.

و يا هلا

[علي العجاجي]

الاخ الشاعر الحميدي

هلا وغلا فيك ويسعدني اللعب معك

الخال ابووليد
حياك وابشر بسعدك


استلم يالحميدي لاهنت



البقا بالرفيق اللي حضر بالختام=يوم جيت المعاني ياولد سوقها
يالحميدي وش الاخبارهي والعلام=يوم جيت البلدوشلون هوسوقها

[سنايدي]

بيض الله وجيهكم يالشعار
وانا بصف الحميدي ولا يهون ابو براهيم
واصلوا واصلوا واصلوا واصلوا واصلوا واصلوا

[الحميدي]

خشم الرعن :
حياك الله وشرفتنا
علي العجاجي :
يشرفني اللعب معك
استلم لاهنت :


سرًها يالعجاجي يا سليل الكرام = بنت زيد الهلالي جاك معشوقها
البلد ما تعيَد يا علي كل عام=مار يابن العجاجي وفَها حقوقها

[صخر]

الحميدي أهلاً وسهلاً بعد كل هالغيبات وتشكر على هالطاروق الكايف .

علي العجا جي تشكر على هالمبادرة وأنا بصفك ولا يهون الحميدي .


الليل الليل سرى يالشعّار

[علي العجاجي]

سنايدي
هلا فيك مرورك شرف بحد ذاته
صخر
ارحب ياخال وجودك بضفي شرف

الحميدي استلم لاهنت


خلها ياولد بين السماء والغمام=وبنت ابوزيدماكل(ن)قدرسوقها
البلد كل عام تعيد وياسلام=والمخايل ياصاحب ناضت بروقها

[الحميدي]

صخر حياك الله وهذا انا جيت بعد ما جوا الر بع
ابو ابراهيم استلم لا عدمتك :


لا تخم السواري والتزم بالنظام=يالعجاجي تهايق وصط صنطوقها
منذ مده لفينا والخلايق نيام =الوسايد تحتها واللحف فواقها

[علي العجاجي]

الحميدي استلم لاهنت


ملتزم بالنظام ولاعليه ملام=والمعاني ترى باينتٍ فروقها
ان بدا النور يارجال يجلى الظلام=والنخل تمرها ياصاح بعذوقها

[الحميدي]

استلم لا هنت :


واجب انك تفرَق في حلال وحرام =والعرب يا عميلي حسب منطوقها
لا تدور ترى وضعي تمام التمام =وانت تنكر غروب الشمس وشروقها

[علي العجاجي]

الحميدي استلم لاعدمتك

بندقي في يميني والفشق بالحزام=والحرار الشقر مطلقةٍ سبوقها
ماهي عادة علي يبحث عن اخطا الخصام=والزبيدي يدور حول رقروقها

[الحميدي]

استلم لا عدمتك :

خابرك يالعجاجي من طيور الحمام =من طيور(ن) تشيل السقم بعروقها
مانشوف الفعايل ..جيد(ن)فالكلام =مار داوي جروح الصدر وفتوقها


تشرفت يا ابو ابراهيم باللعب معك وسامحني اذا بدر مني زلًة لسان وترى الدعوه للعب ووناسه
نلقاك قريباً انشالله

[علي العجاجي]

الحميدي
ابد ما جاء الا الزين والدعوى سعة صدر ومزوح تجي وتروح

استلم لاهنت

الحميدي على عيونه ياربعي عسام=مايفرق جمال عقيل من نوقها
فعلنا صدر ركابك ياصاحب حيام=يالحميدي دليك رقع شقوقها

[$البطـ777ـران$]

ملـتـزم بالنـظـام ولاعلـيـه مـــلام
............والمعانـي تــرى بايـنـتٍ فروقـهـا

انا اشهد انها بينة فروووووقها واللي مايقدر يفرق لايدخل الملعبة

الله الله يابوابراهيم بيض الله وجهك وصح لسانك .

الحميدي ماقصرت ياخوك بس ترااااك في حاجة دوراااات مكثفة بالتفريق وهلم جرى <--- لاتروح تدور دورة بذا الاسم |3|

وانتبه للكتابة والوزن حتى تتطور موهبتك

[محمد السعيدي]

الشعار الكبار : الحميدي , وعلي العجاجي :

بيض الله وجيهكم على العب الكايف.

[الحميدي]

الشـــــــــــــــــــــــــــــــــــــــــــــــــــــاعر البطران :
حياك الله بس جيت انت بالوقت الضايع
وش جاي تدور؟ :D
وانتبه للكتابة والوزن حتى تتطور موهبتك
ههههههههههههه
انت تعلمني عن الوزن؟ هههههههههه
لا تخليني اعلم الناس عن سالفتك ... |3| خلها مستوره احسن ;)

محمد السعيدي:
حياك الله وشرفت يالغالي

[$البطـ777ـران$]

الشـــــــــــــــــــــــــــــــــــــــــــــــــــــاعر البطران :
حياك الله بس جيت انت بالوقت الضايع
وش جاي تدور؟


الحميدي شعراوي جديـــــــــــــــــــد :D :
جيت ادور فن ولقيته من طرف واحد |3|

ههههههههههههه
انت تعلمني عن الوزن؟ هههههههههه
لا تخليني اعلم الناس عن سالفتك ... خلها مستوره احسن


هههههههههههههههههههههههه ياشيخ |3| ان ماعلمتك انا والا علمووووك خوالك الله يخليهم لك |4|

اعلمك وش سالفتي يالحميدي : انك تبطي عظم لا بيوزرك هذا ولا الثاني اني العب معك لانك قوووووووووي :eek:


انا ما همني ذاليل لا مطلق ولا مستور
.........................مركبها على قمة جبل وتهز رجليها :cool:

[الحميدي]

هههههههههههههههههههههههه ياشيخ ان ماعلمتك انا والا علمووووك خوالك الله يخليهم لك

والله الظاهر انك خالي وانا مدري |3|

اعلمك وش سالفتي يالحميدي : انك تبطي عظم لا بيوزرك هذا ولا الثاني اني العب معك لانك قوووووووووي

انا ما عندي الا يوزر واحد... ولا انت شلَه باسم واحد

والله اني ما راح اخلص معك دامي ابي ارد كل ما رديت ..ما شالله الله يعطيك طول الصحه

[$البطـ777ـران$]

والله الظاهر انك خالي وانا مدري

ههههههههههههههههههههههههههههههههههههههههههههه الله لا يقوله انت وردودك

اللي تفشل الله لايبلانا قلنا لك تصفيف حكي ماصدقت |3| .

[سرباح]

الشاعر علي العجاجي والاخ الحميدي ماقصرتو محاورة ممتعة


الاخ الحميدي :- ترى باينت فروقها والشاعر العادي جدا ماتمر عليه وانا اخوك مثلها .

[زجران]

لا تخليني اعلم الناس عن سالفتك ... |3| خلها مستوره احسن ;)




انت ليش ماتلفقه يالحميدي وانتبه لا تخليني اعلم الناس انا عن سالفتك ومن انت ;) لذلك انا اللي اقول لك خلها مستوره


وخل عنك شب الفتن بين عيال العم ومثلك ماله مجلاس عندهم اللي بيجلس بحترامه حياه الله واللي بيوصل كلام ويجيب كلام
يومه وصل وكشفته انا اللي ببدابها :confused:


:eek:

[$البطـ777ـران$]

زجراااان |3|

الحميدي

ملـتـزم بالنـظـام ولاعلـيـه مـــلام
.........................والمعانـي تــرى بايـنـتٍ فروقـهـا
ان بدا النور يارجال يجلى الظلام
........................والنخـل تمرهـا ياصـاح بعذوقـهـا

في الصميم من جد :d

بس وش ذا يالحميدي |3|

لا تخم (السواري) والتزم بالنظام
...................يالعجاجي تهايق (وصط صنطوقها)

اي سواري يابو الشباب |3| خل الشعر تكفى لاهله وانت خلك وصط الصنطوق |3|