محاولة أخرى يالعامري . . .

[الصييفي]

الشاعر العامري،
ودنا نبدأ من جديد بهذا الموّال؛
إستلم لا هنت:


العامري طوّل علينا غيابه
مدري وش اللّي عن ربوعه غدى به
عساه يسمعني و يعطي جوابه
و الله كريمْ، و كل غايب يردِّه


كتبنا وسيمتنا وراحت مع التيار= نبي نبتدي يا صاحبي وحْده جْديده
نبي المنتدى يرجع لعهده، و لا ينهار= مع الطلّة الحلوة، رمينا تجاعيده

و يا هلا

[العامري]

هلا بك يبو وليد واستلم :


يابو وليد الغيبة اللي تطرّي=اسبوع واحد غصب والأمر سرّي
واحذر تجي لظروف الأجواد مرّي=والله كريم وكل غايب يرده





على الله توكل وابرح الدرب يالبيطار=ولا تلحق الفايت حسوفه وتنهيده
يقولون دجّت فتح من عقب ابو عمار=ومحمود دج بها بعد جا الامر بيده







ـ

[علي العجاجي]

الخال خالد المسعود
العامري
بيض الله وجيهكم على هالطاروق بدايه رائعه وانا بصفك يالعامري ولاتهون ياخال

[الصييفي]

أررررحب يالعامرررري و استلم لاهنت:


ما هي محبة علم و الا تجسّس
لا شك و قت النوّ كل(ن) يعسّس
و اللِّي على راسه شذيفة يحسّس
و الله كريم و كل غايب يرده


على الله توكّلناعسى تسهل الاسفار= و لا نيب من يجترّ بالعلم ويزيده
حذاري تسرَّع قبل ما تفحص الاخبار= و الى دفيت عتيبة، تبي تطمر الحيدة

و يا هلا

[الصييفي]

الغالي/ علي العجاجي:
تسلم يبو ابراهيم على حضورك،
و يبي يرزقني الله بمن يمسك صفي
و الا الله يعينك بالمناقز بين الصفين.|180|

ويا هلا

[سعد]

العم الغالي

أبو وليد صح لسانك ولا هنت يالجزل علي ذا الطاروق الرائع

وأبشر بسعدك بمسك الصف معك ولا يهون العامري وأبو إبراهيم .



الغالي

العامري مرحبتين كبار وسلمك الله يالذيب وما غاب من جاء والحمد لله علي السلامة .


الليل الليل يالربع

[العامري]

علي العجاجي:

يا مرحبا يا مرحبا .. شرفت الطاروق .. ونورت الصف .. طال عمرك

سعد :

هلا يابو محمد ومشكور على توصيل الرسالة .. ومشكور على مرورك


ابو وليد استلم:


يابو وليد انته عزيزٍ وغالي=فوق المعزة واحدٍ من خوالي
ما ودنا نكثر معاك الجدالي=والله كريم وكل غايب يرده


علامك تطوّل فالدعاوي وهنّ قصار=معك علم عجّل فكّ يا صاحبي قيده
وأبشهد شهادة بأن لك بندٌقٍ بعيار=ولكنها مرات ما تضرب الصيدة


ـ

[الصييفي]

الغالي، أبو محمد:
مرحبا بك و مشكور على مسكة الصف،
و جهودك كلنا مقدرينها.

حياك يالعامري،
و لا تنس تعرّج على الخاص.
إستلم سلمت:



يالعامري ورا فيوزك قصير(ي)
لازم تحملني، قِبَل، مثل غيري
كل الدعاوي سهلة(ن) يا قصيري
و الله كريم و كل غايب يردّه


أنا و الدعاوي يا ولد مثل جار و جار= أراقب و احلّل حسب فهمي بتجريده
و شهادتك مشكورة على وجهها اللّي صار= و رمية عياري ، من يدي، للهدف سيده

و يا هلا

[محمد السعيدي]

ابووليد والعامري :

محاورة ممتعة ورائعة نتمنى أن تستمر , واضمنوا المتابعة.

[المعنى]

خالد بن مسعود(الصييفي) و العامري

محاورة شيقة وجميلة جدا تابعوا

[العامري]

السعيدي:

الرائع مرورك .. ولا هنت على المتابعة


المعنى :

هلا بك عضو جديد وشاعر جديد ومشكور على المتابعة


ابو وليد استلم لاهنت:


يااابو وليد لوين ودك نوجه=خذ بي على بر السواليف سجه
قدام ما ينقال ذا طرق دجه=والله كريم وكل غايب يرده


انا يالصييفي ما قصدت انهي المشوار=ومن طيبتك ودي متى ما قضى آعيده
ولكن ترى الفلاح واقف معك محتار=يبي درب ٍ ابرح به تصدر معاويده




ـ

[الصييفي]

الإخوة:
محمد السعيدي:
مرحبا بك يبو سفر و نورت الساحة،

المعني:
الله يحييك،
و ساعة جابتك مباركة،

و يا هلا بكم

[الصييفي]

مرحبا بك يالعامري،
واستلم سلمت::



يالعامري ذلك شهور(ن) طويلة
ما قلت لي أنته من أية قبيلة
إن كان هذا ما ترى فيه ميلة
و الله كريم و كل غايب يرده


أنا يا رفيقي كن شوفي حجبه غبار= و لا أعرف عن الشحرور يكود تغريده
ترى السالفة تزين الى جت أخذ و اصدار= و الى جا الطرف واحد، نملِّه و ترديده

و يا هلا

[فارس تميم]

ياسلام ياسلام ياسلام

صح لسانكم يالشعار ،،، طاروق ولا اروع ،، احييتوا الميدان الله يحييكم ويبيض وجيهكم

انا هالمره بصف العامري ،،، ولايهون العميد

والف شكر يالعامري على الإهداء الرائع واعذرني لعدم الرد بالعربي...

بانتظاركم

[العامري]

فارس تميم :

هلا بك .. والعفوووو .. ومعذور .. وشرفت صفي .. طال عمرك على الطاعة



أبو وليد استلم :


أصلي هو اللي به تنادي عليّه
وأظن بان أصلي ما هوب القضية
انا ترا ما نيب ابا العنصرية
والله كريم وكل غايب يرده


يكفي وجوده بينكم واقعٍ ما طار=ولا تبحث الميدان تكثر مقاريده
ياليتك تصب الزيت يا شيخ فوق النار=ترانا مللنا مشيت الجيْده الجيْده





ـ

[الصييفي]

هلا و الله ببو عبد العزيز،
و لا هنت على المتابعة،

والصفوف عامرة و ما دام المدير بصفي،
صوته عن صوتين،
سلمتوا جميعاً.

العامري مرحبا بك،
حلوة "الجيّدة الجيّدة"!، قرويّه قح|353|
لا يكون الخميس الأسود زعّلك؟
إستلم لا هنت:



و النعم، و احذر تتهمني بظلم(ي)
و باكر يجيني "بُش) يشهِّرْ بإسمي
و اصير صيد(ن) للمقاريد دسم(ي)
و الله كريم و كل غايب يردّه


إلى طار دربه درب غيره، مدام اختار= و كلّ(ن) بنفسه حر، مهيب تأبيده
عسى منت ضيعت الدراهم، و تبغى الثار= تراني منسِّب و الحمر صعب تسديده

و يا هلا

[العامري]

استلم ردي الاخير يبو وليد وصح لسانك ولا هنت :


من خلقتي ما نيب أحب الظليمة=فيني عن الظلم وبلاويه شيمه
أيضا ولا أسعى فالعرب بالنميمه=والله كريم وكل غايب يرده



الى راح عنكم راح خمسة من الشعار=وتلوي بعد برنيطة السور للميده
انا ما وخذ لي حق يالفارس المغوار=ومنهو قرب لي حد عيّد قبل عيده


وسلامتكم

[الصييفي]

مشكور يالعامري و لا قصرت.

و يا هلا