ياحظة .. مشاركاتة واجد . ( دعوة للنقاش )

[شاهين]

بسم الله الرحمن الرحيم

السلام عليكم ورحمة الله وبركاتة

صباح\مساء الخير جميعا
--------------

الموضوع هذا قلبتة براسي كثير ومالقيت له الا سبب واحد بس
---------

الموضوع وما فيه ان فيه اعضاء يهتمون بكثرة المشاركات بشكل غير طبيعي

يعني تلقاه يحط كل يوم ثلاث مواضيع تقريبا ( طبعا نقل ) بعدين يروح لمنتدى الألعاب ويرد على كل الألعاب .. بعدين للشات ويحط له سبع ردود ورا بعض ( مع العلم انه يقدر يجمع ردوده كلها برد واحد ولا ياخذ الرد الا سطرين )

بعدين يرجع للثلاث مواضيع اللي حطها ويلقا له كم واحد راد ... ويرد على كل واحد بمشاركة مع العلم انه يقدر يجمعهم بمشاركة وحدة .... لكن هدفه الأول هو كثرة المشاركات----------------

الموضوع هذا حاولت افسره لأجد أسباب منطقية

لكن مالقيت الا سبب واحد بس

اللي هو ... قولة ( ياحظة .. مشاركاتة واجد )
-------------------

للمعلومية احبائي

انا ما اقصد احد معين

لكن كتبت هالموضوع لأبين الهدف الغريب لبعض الأعضاء .. ولأبحث معكم عن اسباب اخرى ممكن ان تبرئ هذه الظاهرة من التفاهة

[ابوشوق]

هلا شاهين

نعم نحن نعاني من هذه الظاهره بشكل عجيب

حتى انه في مره من المرات جيت ابحذف موضوع من المواضيع اللس مالها داعي

قال اللي كاتب الموضوع خله موضوعي تكفى لاتحذفه

مشاركاتي فيه


يعني لو امسح ذاك الموضوع راح منه حوالي الف مشاركه؟؟؟؟؟؟؟

فانا اعتبر اللي يفكر بهذه الامور الصراحه ماعنده فكر واعي...

لكن وش نسوي مانقدر نزعل الحبايب اللي بالمنتدى..

وفي ذلك قراررات حازمه فيما بعد....

ومشكور ياشاهين على الموضوع المفيد

[أكـفـنـي شـركـ]

والله انك صادق ولا هنت على طرح الموضوع الجميل

[فارس القادسية]

هلا شــاهين ...

صحيح فيه بعض الاعــضاء يصفون الالعــاب ...

اناالحمدلله ماشارك بالالعاب الا لعبة وهي حقت البورصة ...

صـحيح مشاركاتي واجد .. بس شوفو معدل المشــاركات ..

وثانكيس شاهيــن ...

[قناص الأزرق]

شاهين انا معك في كلامك لكن منتدى الالعاب والمسابقات ماحطووه الا
عشان نشارك فيه لا اوافقك في هذه النقطه

لاهنت يالغالي...

[الكيف]

والله ما تسذبت ياشاهين ,,,

في منتدى الالعاب صراحة العاب مالها داعي وسامجة ويدخلون اكثر الاعضاء يشاركون فيها ويدرون ان مالها داعي بس عشان يزود عداد المشاركات ,,,

انا معك في هذه النقطة بس :

منتدى الالعاب والمسابقات ماحطووه الا
عشان نشارك فيه (اقتباس من القناص الازرق)

هاذي انا مع القناص فيها ,,,

الف شكر ,, ع الموضوع اخوي شاهين ,,,

[شاهين]

لكن منتدى الالعاب والمسابقات ماحطووه الا
عشان نشارك فيه لا اوافقك في هذه النقطه

القناص كيف حالك انشالله بخير

منتدى الألعاب حطوه عشان تشارك فيه صحيح ... لكن لو تدخله بتلقا فيه العاب أي كلام

امثلة:

عد من واحد الى خمسة واللي ياصل خمسة هو شيخ المنتدى !!!

عد من واحد الى 10 وحط جنبك واحد بقطار الموت

عد من واحد لخمسة واللي ياصل خمسة هو ملك المنتدى !

--------

المشكلة ان مثل هالألعاب مدهرة ومليانة مشاركات مع ان فكرتها وحدة

----------

وموضوعي هذا مهوب عشان منتدى الألعاب وبس ..

المشكلة كبرت وصار فيه اعضاء يدخلون على المواضيع ويردون .. ( مشكور ) , ( يعطيك العافية )

----------

عندي اقتراح لو تجربونه يمكن يفيد

منتدى سعة الصدر قبل فترة طويلة كان اللي يكتب فيه مشاركة مايزود عداد المشاركات .... لو تجربون تسوون هالحركة في منتدى المسابقات والألعاب بتوقف هالألعاب الغريبة وبتجي العاب ومسابقات مفيدة ورهيبة

-----

وشكرا لمروركم جميعا وحماسكم

[(صقر ثهلان)]

والله انك صادق المفروض ما فيه شيء اسمه مشاركات لا ن ذي الكلمه تخرب المنتدى فيه نا س تحوف منتدى الالعاب والمسا بقات الين الصفحه 11 عشان يكثر مشاركات


والا يوصي نا س تدخل بسمه عشان يكثرون مشاركاته """هذي ظاهره ماعلقت عليها

[شاهين]

الالعاب حطت للعب صح ولا


وتوسع الصدر

مدري ليه احس انك كاتب هالرد وانت معصب


انا منيب ضد الألعاب اللي توسع الصدر مثل ماتقول

انا ضد الألعاب اللي ماتوسع الصدر واللي حطيت لها امثلة ... الا ان كانت توسع صدرك فهذا شئ ثاني



وترى المواضيع الي موجوده في المنتدى لها شهر على الاقل

يعني اذا مالقيت مواضيع جديدة في المنتدى تروح لمنتدى الألعاب وتحط لعبة ( اللي ياصل 10 هو شيخ المنتدى ) والا تشارك في لعبة ( قمر 14 ... اللي ياصل 14 هو قمر المنتدى )

يعني تشوف هذا حل؟



وترى الالعاب فيها تواصل بين اعضاء المنتدى


يعني تشوف ان افضل تواصل بين الأعضاء باللعب !!




الله واكبر صارت 1000 ولا 100ماتاثر

المشكلة ان فيه اعضاء همهم الرئيسي هو زيادة المشاركات

يعني عدمهم افضل من وجودهم .... يعني اعضاء غير مفيدين للمنتدى وإنما سجلوا في هذا المنتدى لأهدافهم الغريبة

---------

تخيل معي


كتبت موضوع بـ 50 سطر .... تعبت عليه ... جلست خمس ايام وانت تكتبه وتجمع افكاره والبراهين اللي تسند تلك الأفكار

وبعد ماحطيتة يرد عليك خمس اعضاء بــ ( مشكووور , يعطيك العافية , موضوع رائع , الـخ.. )

انت تدري انهم ماقروه .. تدري ان هدفهم زيادة مشاركاتهم ... والا ماعليهم من الموضوع وكاتب الموضوع .

بذمتك .. ماتنقهر ؟


بالنسبة لي انا اعتبر مثل هالردود اهانة للكاتب

واعتبر ان مثل هالأعضاء اهانه للمنتدى

واتمنى ان تتحرك الإدارة في يوم ما ... وتفي ببعض من وعودها

[ريــآن]

مشكووووور
ان شاء الله بتهتز مهوب بتتحرك

تقبل مروري

تحياتي
______________

[عـــروبــه]

شف صراحه الاعاب تةسع الصدر ويتواصلون الاعضاء

بس يعني إذا كان قصدكم عن المشاركات إقترحو ما تحسب


بس انا احب أنوع بعني موب مسنتره عند الاعاب

ولا ما أدخلها

يسلمو الشاهين

[ابوشوق]

هلا اخوي شاهين


اشكرك على اهتمامك بالمنتدى وشاكرلك مقدر ياعزيزي..


سبق وان رديت على الموضوع من فتره ليست ببعيده وقلت رأيي فيه

بس وجد ان أكثر من يدخل قسم الالعاب من الاعضاء هدفهم زيادة المشاركات

لكن ان شاء الله راح يتخذ في قسم الالعاب الأجراء اللازم,واللي يقول الالعاب توسع الصدر

شارك فيها بس بدون عداد المشاركات مايمشي والا مايوسع صدرك الا لين يمشي العداد هههه

ان شاء راح يكون هاليومين تغيرات ونحن بجهودكم نرتقى للأعلى بمنتديات الشعراء..

شاكرأ ومقدر..

[سنّاف]

والله موضوع جا في وقته لكن لاحياة لمن تنادي
مشكور اخوي شاهين

[ssaale7]

مشكورة عالموضوع

[ssaale7]

بس للمعلومية اكثر منتدى عليه طلب هو الالعاب

[شعراويه]

انا مسنتره هناك


بس مو كل الالعاب ادخلها



بس انا اكثر شي يعجبني هناك


التشااات


وانا الاعضاء اللي القاهم مسنترين هناك


الخلاصه

فكرة ابو شووق حلوه


انو نلعب بقسم الالعاب والعداد مايشتغل بذاك القسم


وانا بالنسبه لي مايهمني عدد ردوودي اهميه كبيره


وووشووكرن اخوي شااهين على الطرح الاكثر من رائع

[فيصل الصمصام]

ياشباب انتم تمشون غلط والله تمشون بالطريق الغلط


صدقوني والله بعض قراراتكم يمكن تطيح بالمنتدى مثل ماطاح قبل سنتين تقريبا

الحين انتم تعيدون نفس اللي سووه قبلكم وتتخذون نفس قراراتهم


نقعد نبني نبني فيه بعد ماطاح مالها داعي يطيح ثانيه

تكفون مانبي نطيح بنفس المشكله مرتين

[جلكسيه]

عندي فكره<لاتحمسون توكم قايلينها بس عبالي أأيدها
قسم الالعاب ماتحسب فيه المشاركات
بس انا اذاشفت واحد طاقة(ن)مشاركاته فوق احسه نشيط مدري ليش
شوكرن عالموضووووووع
والاقتراح حلوووووو........................
تقبل مروري جلكسيه

[شاهين]

نقعد نبني نبني فيه بعد ماطاح مالها داعي يطيح ثانيه

تكفون مانبي نطيح بنفس المشكله مرتين


فيصل كيف حالك

... يعني معجبك انك تبني على اساس غلط؟

على اساس زيادة المشاركات بس ...

على كذا وبعد سنتين قدام بنصير محلك سر ... مانشوف تقدم ولا اعضاء بارزين ... ولا نبني شخصية صح

المشكلة انكم ماخذين ان المنتدى سعة صدر وبس ..

لا ياحبيبي فتّح شوي ... المنتدى هذا نبيه يصير شبه مدرسة ... تفيد وتستفيد , مهوب تعد الين عشرة وتفقش البيضة براس خويك

اذا كان قرار توقيف عداد المشاركات في منتدى الألعاب مايناسبك ياليت تعطينا اسباب ..

بالنسبة لي انا عندي سبب ... اذا حطينا هالخاصية في منتدى الألعاب انا متأكد اننا بنخسر عدد من الأعضاء ... بس صدقني الأعضاء اللي بنخسرهم هم اعضاء تافهين ... يفكرون بزيادة المشاركات .. وأعتقد ان خسارتهم مكسب كبير للمنتدى وللعضو الحقيقي للمنتدى

-----

ياناس فكروا انكم تجعلون المنتدى مفيد وليس مسلّي فقط

ندائي هذا للكل ..

ياشباب الألعاب ( اللي مايدخلون الا منتدى الألعاب ) حاولوا تدخلون باقي المنتديات ... خوذوا المنتدى بجدية شوي ... اذا ماقدرتوا تفيدون استفيدو على اقل تقدير ... هذا بحد ذاته فائدة للمنتدى

----------------

فيصل بما انك مشرف.. بالله عليك وش تبي بعضو كل مشاركاتة بهالشكل ( 1,2,افقش البيضة براس فلان , احكم على فلان انه يسوي كذا ,5, شكرا , مشكور , موضوع رائع ومشكور )

هالنوع من الأعضاء هم اللي حاسوا المنتدى صدقني

[شعراويه]

انا معاك اخوي شاهين صح



لازم نتجووول بكافة الاقسام


بس الالعاب ماتنحذف


نلعب بس بدووون العداد مايمشي هذا حل حلوووو


اتمنى اذا به احد يوووافقني الرأي يرد

[شاهين]

بس الالعاب ماتنحذف

هلا شع شع << كيف الدلع :D

محد قال ان الألعاب تنحذف ... قسم الألعاب مهم جدا في اي منتدى ....

مهوب اذا قلنا اننا نبي جدية نلغي التسلية !

لا .. نحاول نوازن بين الكفتين جدية وتسلية

انا شخصيا من المعجبين بقسم الألعاب ... بس فيه ملاحظات على بعض الألعاب الكل يعرفها ( والمشكلة الكل يلعبها ) :D



اتمنى اذا به احد يوووافقني الرأي يرد


حتى انا :D

-----------

تعبت من الكتابة ... لو فيه عدّاد حروف خذت الأول :D

ورا ماتحطون عدّاد حروف :D

[شعراويه]

ههههههههههههههههه



هلا <<< اكره الدلع ذا الله ياخذ عدو شيخة الغيد



اقووول عد لخمممسه وينحط عداد حرووف

:)

[شاهين]

اقووول عد لخمممسه وينحط عداد حرووف

خخخخخخخخخخخخخخخخخخ والله متأثرة من جد.
---------------------------


واحد من الناس
وعن الردوود وش تبيه يقولك الى كنت كاتب قصه ولانكته؟

لو كنت كاتب قصة مثلا ... وكان فيه عضو قراها .... صدقني مهوب راد بــ مشكور ,, بس

تدري وش بيسوي العضو اللي قرا القصة؟

يقتبس سطرين او سطر ويعلق عليه ... ( يمدح , ينقد , يستفسر الــخ,,..)

يعطيك رأيه بمجمل القصة ... اللي اعجبه فيها واللي ما اعجبه ... ويعطيك رأيه بأسلوبك

-------------

هذا تحس انه قرا القصة .... مهوب ابو مشكور وطقة مشكور

[فيصل الصمصام]

هلا شاهين

انا معاك انه فيه مشكله ويبيلها حل


لكن مانبي ناخذ نفس القرار اللي اخذوه مشرفينا السابقين

زي مايقولون مانبي ناكل نفس العلئة اللي فاتت

يعني مهوب ناخذ نفس القرار وهمن المنتدى يطيح ثانيه

صح ان الواحد يغلط مره

بس مايطيح بنفس الغلط مرتين... ولا ومن زين طبايعنا ناخذ نفس القرار بعد



يعني كنك داخل اختبار ومافيه الا سؤال واحد وجاوبته خطا

ويجي الدور الثاني وتجاوب نفس الجواب !!!!
يعني وش رايك يمكن تنجح هالمره !!!
اكيد لا




عاد انا والله ماعندي حاليا قرار ثاني



بس صدقني

ترا لو نقعد كذا احسن من اننا نطيح بنفس القرار اللي خذناه قبل ولا نفع

ترا لو اتخذتو نفس القرار اللي قبل

اسمحولي اقول ان هذا الشي له مصطلح يسمى ( غباء )

مع احترااامي الشديد لجميع الأعضاء والمشرفين والإداريين طبعا



على الأقل نقعد كذا لين نلقى القرار الصارم <<<< اخس ياصارم منيب سهل والله

يعني اقصد لين نلقى القرار الصح



وارجو اني ماطولت عليكم

[عبدالعزيز الربيع]

السلام عليكم

اول شي صراحة اخوي شاهين اشكرك كل الشكر على هذا الموضوع الرائع

وانا صراحة من اشد المعجبين بك وبكتاباتك التي تدل على ثقافتك وسعة ادراكك مشا الله عليك.

وبعدين انا صراحة ما اشوف انه من الظروري انكم توقفون المشاركات انا اشوف المنتديات الثانية ماشية امورهم بالمشاركات ولا عندهم اي مشكلة

بس منتدى الشعراء الي من عرفته لي 4 سنين يمكن وهو مشكلته المشاركات

انا اشوف ان عداد المشاركات يمشي ولكن المواضيع التافهه والي هدفها زيادة المشاركات هذي لازم تحذف ومعروفة هذي المواضيع الالعاب الي مالها داعي العاب البيض والببسي والقطار

انتم اذا حذفتوا الالعاب يضطرون الي يحبون المشاركات انه يردون على المواضيع الي في المنتديات الثانية



وعندي فكرة جهنمية جدا

هذي الفكرة بتخلي الاعضاء يكتبون مواضيع ويجيبون معلومات جديدة

انا ما ادري اذا هذي الخاصية موجودة ولا لا

لكن الفكرة هي ان المشاركة تحسب برد واحد بس

اما الموضوع يزيد مشاركات العضو 5 مشاركات مثلا

حب بعض الاعضاء للمشاركات مشكلة صح

ليه مانستفيد من هذي المشكلة ونخيها تمشي في صالحنا

اتمنى ان فكرتي تطبق والله بتشوفون تغيرات كثيرة


ومشكور يا شاهين وما قصرت يالغالي

[ssaale7]

عندي اقتراح سو موضوع تصويت ونشوف

[عبدالعزيز الربيع]

http://www.alsh3ra.net/vb/showthread.php?t=8119


هذا موضوع فيه عضو يقول ابي اصير مشرف شوفوا وش رد عليه ابو دحيم المعروف انه كان من الادارة

و ثاني شي انت مشاركاتك ما وصلت حتى ال 200!!
و لا شفنا لك الا رد او ردين في منتدى الحوار
ولا شفنا بعد اي موضوع لك في نفس المنتدى
فشلون تبينا نحكم على امكانياتك في مثل هذا المنتدى!!!!...


يعني المشاركات مهمة للعضو بس في الشي المفيد

[فارس القادسية]

والله اقتراحك حلووو يابوربيع ..

[عبدالعزيز الربيع]

وش رايك بس يا فارس <<<<<< استانس

[شعراويه]

مافهمته


ابدن تكفووون


<<< مازلت خارج نطاق التغطيه

[عبدالعزيز الربيع]

وشلون يعني يا شعراوية ما فهمتي اقتراحي؟

[شعراويه]

ايه ابو ربيع اخر شي


مافهمت وش لوون

[عبدالعزيز الربيع]

يعني الحين انتي اذا رديتي على موضوع وكانت مشاركاتك 0 مثلا راح تزيد وتصير 1
بس لو تكتبين موضوع بتزيد من 0 الى 5

يعني المشاركة الزيادة 1
والموضوع الزيادة 5

كذا

هاه عساك فهمتي ؟

[شعراويه]

اييييييييييييييييييييييييييييييييييييييييييييييييييييييييه



فهمت فهمت <<<< بدري




يعطيك العافيه


والله حلووو

ماقصرت عا التووضيح

[ssaale7]

فكرة حلوة مره

[ssaale7]

بس مفروض الموضوع اكثر من 5 لانك ما تقدر تقارنه بـ5 ردود
وتحطون منتدى اسمه المواضيع البايخة اي موضوع بايخ يروح هناك

[عبدالعزيز الربيع]

صالح

الحين خل الناس يكتبون مواضيع عساها بايخة بس اهم شي يكتبون

[ssaale7]

لا ياخي فيه مواضيع بايخة زي المشاركات الي تتكلم عنها

[عبدالعزيز الربيع]

اذا كثرت المواضيع وصرنا والله ما نلحق عليها هاك الساعة تعين الادارة واحد مختص بالشي هذا

واقتراحك حلو يا صالح

بس اتوقع يبيله وقت شوي

وجهة نظر

[الروح]

يارجال كله منتدا وسع صدرك وطلع

[ssaale7]

هاه وش قررتو عليه

[شاهين]

لكن مانبي ناخذ نفس القرار اللي اخذوه مشرفينا السابقين

زي مايقولون مانبي ناكل نفس العلئة اللي فاتت

يعني مهوب ناخذ نفس القرار وهمن المنتدى يطيح ثانيه

صح ان الواحد يغلط مره

بس مايطيح بنفس الغلط مرتين... ولا ومن زين طبايعنا ناخذ نفس القرار بعد

حبيبي فيصل ... كيف حالك

فيصل يعني تشوف ان هالقرار هو اللي طيّح المنتدى هذيك الطيحة وهو اللي أبعد اغلب الأعضاء عنه ؟؟

يعني تشوف ان الأعضاء القديمين والنشيطين في ذاك الوقت كان همهم الأول زيادة المشاركات ؟ ويوم وقفّوا عدّاد المشاركات ضاقت صدورهم وهجروا المنتدى ؟؟

انا اخالفك الرأي يافيصل

بالعكس .. الأعضاء القديمين ( مهوب نقصن في الجديدين وانا منهم ) كانوا غير مهتمين بالمشاركات ولا عطوها وجه ... وكان المنتدى في بدايته مدّهر ( عشانه جديد ومثل مايقولون طافرين فيه ) وكانوا اعضاءه يكتبون من عندهم يعني من دون نقل ... وكان العام مشتعل والرياضي مشتعل وسعة الصدر مشتعل .... وكانوا الأعضاء مبسوطين على هالإدهار ... والسبب الرأيسي لإدهارهم هو انهم مايعرفون بعض وتواصلهم كان عن طريق المنتدى ...

الى ان جا اجتماع اعضاء منتدى الشعراء ....و تعرفوا اغلب الأعضاء على بعضهم وصار بينهم تواصل اكثر واكثر ... خف التواصل عن طريق المنتدى وزاد عن طريق الماسنجر والجوال والزيارات احيانا .... وبكذا بدا ادهار المنتدى يخف تدريجيا ....

---------------------

ولذلك انا اقول ان طيحة المنتدى كان سببها الإجتماع .... برغم محاسنة كان له مساوئ.

المنتدى وهو في منتصف هبوطه دخلو فيه بعض الأعضاء اللي كان همهم زيادة المشاركات ... وكان هدف هالنوعية من الأعضاء منتدى سعة الصدر ومنتدى الألعاب ... وصارت المواضيع المنقولة تكثر والعاب ( عد الى خمسة ) تكثر .

حسّت الإدارة بالتكرار ... ولاحظوا ان فيه اعضاء وجودهم في المنتدى له سبب واحد ... اللي هو زيادة المشاركات.... الإداره وقفت عداد المشاركات في منتدى سعة الصدر ومنتدى الألعاب .

الأعضاء اللي همهم زيادة المشاركات هجروا المنتدى ... وبقا الأعضاء الهامين واللي همهم سعة الصدر وليس زيادة المشاركات .... بدا المنتدى يستعيد بريقه وبدا يرتد للأعلى ... لكن مشكلة الإجتماع كانت اقوى منهم .... هذيك المشكلة اللي خلّت اغلب الأعضاء يهجرون المنتدى او يخففون زيارتهم له .

اتمنى ان وجهة نظري وضحت للجميع .. وتبين ان توقيف عداد المشاركات كان مهوب سبب في هبوط المنتدى...


ترا لو اتخذتو نفس القرار اللي قبل

اسمحولي اقول ان هذا الشي له مصطلح يسمى ( غباء )

اسمحلي

من الغباء ان الواحد مايدري وش السالفة ويتظاهر انه يدري وش السالفة




على الأقل نقعد كذا لين نلقى القرار الصارم <<<< اخس ياصارم منيب سهل والله

يعني اقصد لين نلقى القرار الصح


اسمحلي

ومن البلاهة ان الواحد ينتظر الحل يجيه .


---------------------------

مشكور يافيصل على المرور وإبداء وجهة نظرك


---------------------------------


عبدالعزيز الربيّع

قبل كل شي مشكورعلى الكلام الجميل


وعندي فكرة جهنمية جدا

هذي الفكرة بتخلي الاعضاء يكتبون مواضيع ويجيبون معلومات جديدة

انا ما ادري اذا هذي الخاصية موجودة ولا لا

لكن الفكرة هي ان المشاركة تحسب برد واحد بس

اما الموضوع يزيد مشاركات العضو 5 مشاركات مثلا

حب بعض الاعضاء للمشاركات مشكلة صح

ليه مانستفيد من هذي المشكلة ونخيها تمشي في صالحنا

اتمنى ان فكرتي تطبق والله بتشوفون تغيرات كثيرة



الفكرة متعوب عليها ..

لكن بتجي مشكلة ثانية بس بشكل اكبر .

اول شي المشكلة الأولى ماتغيرت ... يعني لازالوا الأعضاء اللي بالي بالك على حالهم .. مدهرين

ثاني شي ولا أسهل من نقل الموضوع ... كل يوم بيحط ثلاث مواضيع وكلف على نفسة وقت


وبعدين انا صراحة ما اشوف انه من الظروري انكم توقفون المشاركات انا اشوف المنتديات الثانية ماشية امورهم بالمشاركات ولا عندهم اي مشكلة

انا ماقلت بكل المنتديات ... قلت بالألعاب بس ... منها تختفي الألعاب البايخة والأعضاء التافهين


مشكور على مرورك يابو ربيع وعلى اقتراحاتك الحلوة


-------------------------
واحد من الناس ... حبيبي العصبي ... كيف حالك انشالله بخير


السلام ياشاهين ياخي قالك مشكور ماسبك غيره مايرد عليك


صدقني ياواحد من الناس ... لو تكتب موضوع وتتعب عليه ويجيك واحد يرد عليك بـ مشكور ... والله انك تتمنى انه مارد احسن ... لأنك تدري انه ماقرا موضوعك .... لأنك تدري انه لو قراه مهوب قاريه الا شاده شي في الموضوع ... ولو شده شي في الموضوع على الأقل علّق عليه .

وانت ماحطيت الموضوع اللي انت تعبان عليه عشان تدور كلمة مشكور ..

عشان كذا انت تدري انه يبي يزود مشاركاته على حسابك انت وموضوعك وهو اصلا ماهمه موضوعك ولا درى عنه.

عشان كذا اقول مثل هالردود إهانه للكاتب وللموضوع


اتمنى وضحت الفكرة ياواحد من الناس

---------------------------------

أطول رد بالعالم :D

[فيصل الصمصام]

يابعدهم والله <<< وش جانا

المهم

اخبارك


قبل اي شي انت رهيب



واعجبني كلامك وتوضيحك وتراني ماقريت الا ردك علي يوم وصلت ابوربيع وانا انزل ارد


يمكن اكون انا ابله مثل ماقلت

لكن اللي يطيح بنفس القرار الفاشل اللي صار قبل كذا بالله وش تسميه ؟؟ <<< سؤالن لك


وانا يوم اقصد اننا ننتظر لين يجينا الحل مع اننا لو قعدنا فعلا ماراح يجينا ولا شي <<<< وهذي مثل ماقلت تعتبر ( بلاهه )


بس صدقني ياشاهين


نقعد نفكر بحل ثاني ولا ناخذ نفس القرار اللي قبل

هذا اللي ابي اوصله والظاهر نص الأعضاء مافهموه لين الحين


من الحماس اكتب نفس الكلام مرتين بنفس الرد




وفعلا زي ماقلت الإجتماع يمكن كانت مساوئه ضرت علينا بالمنتدى


بس والله
انا اشوف واجزم 100% ان المشاركات لها دور فعال بكل الأعضاء ولا احد يقدر ينكرها
لكنها تقل نسبتها عند البعض وتزيد عند البعض الأخر



بس مدام انكم جازميييين وعازميييين يعني فيكم فيكم توقيف المشاركات
اجل اشوووف من وجهة نظري المتواضعه انكم توقفون كل المشاركات ولا يصير اصلا فيه مشاركات خير شر... اذا كنتوا تبون مشكلة المشاركات تروح


وزي مايقولون اذا تبي تفتك من مشكله تطلعلك كل شوي من جهة اقطعها من جذررررها وافتك




والله يمكن يجي واحد ويعارضني بس تكفون شرشحة شاهين تكفيني شهر

[عبدالعزيز الربيع]

فيصل

حلوة شرشحة شاهين

هههههههه

[شعراويه]

السلام عليكم



الموووضوووع وضع للنقاااش



ولكن اتمنى يكوون الاسلووب ارقى اخووواني


والله يكتب اللي فيه الخيره


|44|

[شاهين]

هاهـ فيصل وصلك الحل والا الى هالحين

<<< ضاق صدره من ثلاث اعضاء لهم كم يوم مدّهرين بزيادة المشاركات

UP للأهمية