المساعد الشخصي الرقمي

مشاهدة النسخة كاملة : الــســيكل لو تدرون عن فوائده ماعاد ركبتوا السيارات..


أم سعد
01/02/2009, 12:44 AM
الــــســـــــلااااام علـــيكم..

الــسيـــكل او الدراجهـ ..الكثير يعتبرها اداة تسليه وترفيه لكن يجهل فوائدها ..
فحبيت ابحث عنها وجبت لكم ذا الموضوع عساها يفيدكم ..
وعــلى فكره ركوب السيكل يعتبر بديل ممتاز لرياضة الركض البطيء لانه يحتاج لجهد أقل من مفاصل الركبة..

الفوائد الصحية :
- تقليل من تراكم الدهون وخاصة حول عضلات الخاصرة والبطن والفخذين وكل عضلات الجسم.
- تساعد على مرونة الجسم، وتنظيم عمل الاعضاء، وخاصة القلب، وتقوي عضلاته وعضلات التنفس.
- تتحسن حالة القلب إذا مارس الانسان رياضة ركوب الدراجة لمدة نصف ساعة يوميا..
- وأن ممارستها لمدة 50 دقيقة يوميا يساعد في عملية بناء البروتوبلازما اللازمة لاحراق الدهون ..
- ركوب الدراجة لمدة عشر دقائق كل يوم يساعد في تقوية العضلات والدورة الدموية ومفاصل الجسم..
- في الجسم فضلا عن أن هذه الرياضة تعمل على تقوية عضلات الظهر والعمود الفقري..
- تساعد على ترك التدخين ونسيانه..

يعني تساعد على قضاء وقت الفراغ و تسليه و ترفيه و رياضه بنفس الوقت.. ياسلاااام :)
ونلاحظ الكثير يستخدمونها في الدول الاجنبيه اما عندنا تعتبر عيب وللبزران والهنود والمصاريه..
وعلى قولة اخوي ابوربيع لو تستخدها في الشعراء سموك سييكلان |44| ..

واختم موضوعي بهــذي الــصوره الناردهـ :

http://www.qwled.com/vb/imgcache/151261.imgcache

طبعا معروف ان الاميـر الوليد من اهم المحافظين على جسمه والرياضه اليوميه ومنها ركوب السيكل ساعه متواصله يومياً >>هذي المعلومه قريتها بكتابه على ما اظن ..
والصوره طبعا في دوله اوربيه لان مستحيل يسويها بالسعوديه |245|..

يلاااا عاد كل واحــد ياخذ ه فره بالحاره يومياً على السيكل وتشوفون بعد شهر ان ما اختفت الكروش |44|

الخيل عشقي
01/02/2009, 05:49 AM
وعليكم السلام ورحمة الله وبركاته


ماشاء الله عليك مره موضوع سيكل تشيله مثل الشنطه ومره فوايد السيكل شكلك راعية سياكل هههههههه


عافاك الله على حرصك وتنقية المواضيع المفيده .. لكن مثل ماقال ابو ربيع وش يفكنا من مناقيد اهل الشعراء .. وفي الرياض وش يضمن لي انه مهوب طاردني ورع من وراعينهم يحسبني بنقالي ههههههههه


سلمت يمينك على هالنقله


وننتظر جديدك ومفيدك


برايفت جروح الوقت / هديتك على هالرابط

http://www.alsh3ra.com/vb/showthread.php?t=22619

أبوهتون
01/02/2009, 10:10 AM
وعليكم السلام ورحمة الله وبركاته

مشكــــورة أخـــــتي الفــــاضلــــه جـــــروح الـوقـــت علــــى ما أبــــديتيــــه فــــي موضـــوعـك مــــن الفـــوائــــد الصحيـــــه

لسيـــاقـــة السيكـــل ، وأنــواع التطنـــز لو يســــوق الـواحـــد فينــــا السيكــل عــــاد فــــي الشعـــــراء تلقـــاك مــــن بكـــرة حــــديــــث المجــالــــس

وقصــــور الجمــاعـــــه اللــــي علـــى طـــريق الشعــــراء وكلـــن يســـأل عســـى فـــلان مافيــــه سكـــر ومـــن هالكــلام

واللـــي يقــــول الحمــــدلله العقـــــل نعمــــــه مــــن الطنـــزه

دمــــــــتي بخيــــــر وســـــــلام وحفــــــظ مــــــــن الرحمـــــــن

أخوك إبراهيم اليحيى ( العسكري )

سعد
01/02/2009, 01:53 PM
وعليكم السلام ورحمة الله وبركاته

أختِ الفاضلة

جروح الوقت

الله يعافيك على ذا الجهد وما تقصرين .

بصراحة من حول أسبوعين ثلاثه يوم دفاء الجوء شوي طلعت مع عيالي بالحوش وسقت واحد من سياكلهم أخذت عليه كم لفه .

الله يجيرك ما أمسيت من التعب وعوار الرجلين وعضلات الفخوذ والونين :D

بين قوسين ما أتذكر أخر مرهـ سويت رياضة فيها ... بس الله يستر .


بحاول أعدل في جدولي وأحط لي وقت للمشي أو على الأقل المشي ع السير :)


دمتِ بحفظ الرحمن

السهران
01/02/2009, 02:31 PM
والله السيكل لها فوائد واجد
لكن من يقدر يركبه ماعاد نقدره
مشكوره ياجروح الوقت الله يعطيك العافيه

ماصار
01/02/2009, 02:52 PM
والله السيكل احبه بس صعبه نركبه بالشعرا علاطول عيارة على قولتس مشكوره ياجروح ويعطيتس العافية

أم سعد
02/02/2009, 03:50 AM
عاشق الخيل ..
حياك الله اخوي ..

ماشاء الله عليك مره موضوع سيكل تشيله مثل الشنطه ومره فوايد السيكل شكلك راعية سياكل هههههههه
امحق راعية سياكل ..احب السيكل بس ما اعرف اسوقه الا ذاك الي يصير له عجلتين بالنص مساعده عشان يوقف ولا العادي ما اعرف اسوقه حتى اذكر منول قبل مانتغطى :) كنا متجمعين احنا وبنات خالاتي وواحد من عيال خالي يعلمنا سواقة السيكل بفلوس طبعا واللفه بعشره ريال وانواع التمنن وتاليتها ولاوحده عرفت تسوق السيكل >>قصة حياتها |44|


وفي الرياض وش يضمن لي انه مهوب طاردني ورع من وراعينهم يحسبني بنقالي ههههههههه
ههههههه مهوب شرط بالشوارع يعني بالبر ولا الاسترحه ينفع


سلمت يمينك على هالنقله
الله يسامحك تراني ما نقلته كاتبته |370| والفكره من راسي بس السبع فوائد هم الي ناقلتهم >>ماقصرتي :p ولابعد لي يومين اجمع فيهم وحتى الصوره حست لين لقيتها >>اشوا انها ماقالت اني مصورتها خخخخ


عافاك الله وجعلك تسلم على التشجيع
وبالنسبه للرابط ترى غير مسموح لي بدخوله مدري ليش ..!! شكله بالاداري او انه موضوع انحذف.. عموما كانها القطيوه تراي شفتها ومشكور والله يعافيك ..

أم سعد
02/02/2009, 03:55 AM
العــسكري ..
حياك الله مشرفنا القدير ..

وقصــــور الجمــاعـــــه اللــــي علـــى طـــريق الشعــــراء وكلـــن يســـأل عســـى فـــلان مافيــــه سكـــر ومـــن هالكــلام

اي والله من ذا الناحيه ماكذبت الي بيقول مصخن والي بيقول انهبل ...
بس مثل ماقلت استخدموه في الاستراحات والا حوشة البيوت اذا كانت كبيره ..

الله يعطيك العافيه وشاكره لك تواجدك :) ..

أم سعد
02/02/2009, 04:13 AM
ســعـــد ..
حــي الله رئيســنا.. :)

الله يعافيك على ذا الجهد وما تقصرين .
ويعافيك ويجزاك خيــر ..
الله يجيرك ما أمسيت من التعب وعوار الرجلين وعضلات الفخوذ والونين |44|
المشكله مهيب من السيكل يمكن لانك طولت وانت ماتعودت عليه فشــي طبيعي تتعب العضلات لانها تعرضت لاجــهاد وضغط ماتعودت عليه .. مهوب السيكل لحاله حتى الرياضه بشكل عام اذا كان الواحد مايمارسها بشكل يومي وفجئه بدى فيها ولمده طويله تتعب..يعني مثلا رياضة المشي اذا كان الواحد ماتعود عليها لازم يبدى فيها بالتدريج اليوم الاول عشر دقايق والثاني ثلث ساعه والثالث نص ساعه وكذا لحد مايوصل ساعه او الوقت الي يبيه ..


بحاول أعدل في جدولي وأحط لي وقت للمشي أو على الأقل المشي ع السير :)
الله يقويك ويعينك .. والجميع..

يعطيك الف عــافيه على تواجــدك الي نور موضوعي ..

أم سعد
02/02/2009, 04:32 AM
والله السيكل لها فوائد واجد
لكن من يقدر يركبه ماعاد نقدره
مشكوره ياجروح الوقت الله يعطيك العافيه



الــسهران يعني بتعلمنا ان ماعندك سيــكل الحــين ..!! |44|


عموما .. الله يعافيك وماقصرت على هالرد .. :)

أم سعد
02/02/2009, 04:33 AM
والله السيكل احبه بس صعبه نركبه بالشعرا علاطول عيارة على قولتس مشكوره ياجروح ويعطيتس العافية


الله يعافيك اخــوي ماصار ..
وتسلم على المــشاركه ..
ماقصرت :) ..

ام محمد
02/02/2009, 11:48 PM
وعليكم السلام ورحمة الله وبركاته ...

الغاليه جروح ..


تشكري على هالموضوع الرائع ..وكما تفضلتي له فوائد كثيره ويعتبر رياضه بدنيه ..
وبالنسبه للشباب تلقينهم قلوبهم تفرك لا شافو سيكل ودهم يركبونه بس يخافون على برستيجهم

ولا طلعو لاستراحه انواع التفحيط والسباقات تشوفينها



وابشرك الحمدلله اعرف اسوق السيكل والرول سكيت بعد ..بصراحه متعه |44|

ربي يسعدك ويحفظك

أم سعد
08/02/2009, 12:40 AM
حياك الله يا ام محــمد ..
والله انتس منتيب هيــنه اجل راعية سياكل ..
ماودتس تعلميني واعطيتس عرقــه خخخخ >>لفهم المصطلح راجع الديوانيه |44|

ماقصرتي يالغاليه ..
نورتي الموضوع بتواجدتس ..

عبدالعزيز الربيع
09/02/2009, 02:27 AM
والله الموضوع مهم وعلى الوتر الحساس

لكن المشكلة المجتمع ما يساعد ابد

وكذلك الجو


يعني مرة من المرات لقيت سيكل في بيت واحد من العيال حق اخوه الصغير

وركبته وقعدت افر فيه بالشارع شوي جاني وقالي انت مهبول لا يصورونك الحين ويحطونك في اليو تيوب |44|

وش انا مسوي علشان يحطوني في اليوتيوب

وش زود الوليد عني كلها كم مليون بس


ولا بعد الحين مديون 10 ملياردولار وانا مكافاتي بتنزل الاسبوع الجاي يعني انا اتجر منه



مشكورة اختي جروح على كتابة الموضوع التي افتقدناها موخرا <<< اقصد انه نادر ان العضو يكتب موضوع من نفسه


مشكورة اختي جروح وما قصرتي

أم سعد
10/02/2009, 02:46 AM
ابوربــيع ..

حياك الله اخوي ..

والله الموضوع مهم وعلى الوتر الحساس
لكن المشكلة المجتمع ما يساعد ابد

ماعليكم من المجتمع ابدا ماعليكم صحتكم ولياقتكم >>ناويه تفضح بكم


وش انا مسوي علشان يحطوني في اليوتيوب
وش زود الوليد عني كلها كم مليون بس

اي بالله وشــ زود الوليـــــد

ولا بعد الحين مديون 10 ملياردولار وانا مكافاتي بتنزل الاسبوع الجاي يعني انا اتجر منه

الله يرزقك ولاتنسانا تسان عندك سلف


شكورة اختي جروح على كتابة الموضوع التي افتقدناها موخرا
الله يجــزاك الجــنه .. وماقصرت على التشجيع ورفع المعنويات الي بعد افتقدناها

عافاك الله..

STOB هلالي TOB
06/03/2009, 02:27 PM
والله فوائده كثيره جدا يساعد على كل شي منها رياضه ومنها تخفبف وزن والحمدلله كل يوم اركب سيكلي يمكن نصف ساعه باليوم


تحــــــيــــــاتــــــي