تكفون يا هل الشعراء خلونا نحطم الرقم القياسي

[الكاسر]

تكفون يا هل الشعراء خلونا نحطم الرقم القياسي بعدد الردود
بحيث يكون كل رد ببيت من الشعر
وهكذا ...
ونريد اكثر عدد من الردود
:cool:
بس كل رد يتكون من بيت واحد وما يصير تكتب ردين ورا بعض
ويالله نبدا
مناول واحد بيرد وراي
:confused:
|4|

[الكاسر]

متى يجي في نجد حسن التدابير **** حتى يجي للصابرين انفراجي

[سعدالسيف]

عسى الحيا يسقي هكا الضلع الأسمر ** إلـى ذكـرته غــايب الــموت جـاني

[الكاسر]

ياشباب نبي تفاعل
:mad:

[الكاسر]

وهذا بيت
جيتك مع سود المجاهيم حافي .... ينشدك عقب البطا كيف الاحوال

[هاني]

ياالهواوي شيك ابيوتك قبل ترسلها...وانتبه لاتسرع بردك قبل تفطن له

(شيك)الياء مشددة بالكسر

[الصحاف]

أخي: الهواوي

طلبك غيرواضح

تأتي بقصيدةٍ للشاعر: بندر بن سرور

وأظنك لا تعرف هداك الله ما معناها وتخطئ بها وتقول:

(بنجد) وهي بهذا مكسورة والصحيح(في نجد) وتريدنا نرد عليها

ويأتي الأستاذ: سعد السيف بردٍ مخالفٍ مطلعه لعجز قصيدتك

ولم تقل له أحسنت, ولا أخطأت.

كيف تريد أن تكثر ردودنا.......

الصحاف

[الكاسر]

مشكور اخي الصحاف واخي هاني على التوضيح
:D
اما بالنسبه انك لم تفهم :
انا اقول اننا في هذا المنتدى نريد ان نحصل اكبر عدد ردود بهذا الموضوع
بحيث تكون الردود كثيره لكي نحطم عدد الردود فهناك منتديات وصل عدد الردود فيها اكثر من 800 رد واغلبها ابتسامه ولا لوووووووووول ولا كلام فاضي اما نحن نريد بهذا الموضوع ان نجعل كل رد على هذا الموضوع باي بيت تختاره اي بيت يطري على بالك قوله
وهذا والسلام ارجوا انك فهمتني
:cool: :D
|4|

[الكاسر]

يا ذيب انا بوصيك لاتكل الذيب *** كم ليلهً عشاك عقب المجاعه

[ابودحيم]

يا معدي المرقاب خله لمشطون ..... حول و خل مولع القلب يرقا

[الشبرمي]

الا ياليت منهو للمهار العاصية عساف**يطوعهن على دروب المجافل لين يعـطـنـٌه

[thahlan]

لاتسألن بني ادم عن حاجة #### واسل الذى أبوابه لاتحجب

[الكاسر]

ابودحيم&الشبرمي&thahlan
مشكور على التفاعل ويانا
نقول للباقين ردوا
البيت يقول:
ان لكثرت الاشاوير ماشير *** وحلفت ماجي بارزً مادعاني

[ولدالذيب]

الهواوي
فيه اعتداء سافر على توقيعي |3|
لكن خذ هذي
ما ينحني راسي وانا من بني زيد ××× لوينحني راسي برجلي وطيته
تحياتي
وللمعلوميه ترى البيت لسيف الشعر ابو عبيد

[الكاسر]

قد يبيع الانسان شئً قد شراه ***** ولكن لايبيع قلباً قد هواه

[سعد العبود]

ما فهمت اللي تريده يالهواوي ** بس ابا اغني مع اللي يطربوني

[الكاسر]

انا ابي نحط اكبر عدد ردود بموضوع واحد
وبس ارجو انك تكون قد فهمت يا خي سعد
حي السحاب اللي سوق التباشير %%% ماحلا هطول الغيث عقب انقطاعه

[المستشار]

الله على اللي يوم يفتل عموده%%%يظهر ثرى ارضٍ بعد القيض ماها

[Professional]

مداك اعمار يادنيا ويا دنيا مداك اعمار *** انا احسبها بقيفاني قبل تحسيب خطواتي
لسيف السيف

ياليت الاخوان الاعضاء اللي يكتب بيت يكتب قائل البيت اذا امكن ........

تحياتي ،،،،،،،،

[سعد العبود]

ديرتي فيها الكرم والخير فيها**صنعت ساس المراجل وارفعتهم

[الصحاف]

شكراً للإيضاح

وآسف على طول الغياب





عزي على اللي ما عرف مثل شرواك *** شرواك مكسب يوم غيرك خسارة

[سعد العبود]

منتدى الشعراء ضهر و الفعل وافي * بانوا رجال المهمات الخطيره
;) ;)

[الصحاف]

يا سعد يا بو العيون المستديرة ******** يا كبير المنتدى شيخ الرجالِ

[سعد العبود]

وانت يالصحاف ياشيخ العشيرة****بانت افعالك الى جالك مجالي

[الصحاف]

الجهود تقوم في شورٍ وشيرة ****** ما تقوم بشخص لو فاق الخيالي

انشد المقوع وثهلان وسميرة ******* والسنافي ذيب طرّاد الثعالي

[الشبرمي]

اخوي الهواوي
وين الشباب عن الردود على صرختك التي ناديت لتحطيم الرقم
اشوف الفرق بين الرد والآخر بالأيام ماهو بالساعات
تحياتي.........................

[سعد العبود]

انت يالصحاف لك دعوى خطيرة****** شفتها واليوم الى ياهم لالي

الأمر معروف به خيرن وخيره******ومايشيل الحمل ياكود الجمالي

مهوب لو نروح للشعبي يالصحاف احسن .....................

[الكاسر]

مشكور اخي سعد العبود والصحاف على هذا التفاعل واقول ترا المنتديات وصلو 10 صفحات من كثره الردود وحنا صفحتين باسبوعين لوووووووووووووول
وارجو التفاعل من باقي الاعضاء
:D
قالو تحبه قلت ماهوب بالحيل *** بس هو اغلى بشوي من نور عيوني
|4|

[سعد العبود]

ياقصر ياللي في مداج الذيابه ###بين العرين وبين خشم ثهلاني

[ابو قصي]

يـَاعَـلْ قَـصـْـرٍ مَـايِـجِـي لِـهِ ظــلالِي ***** يِـنْـهَـد مِنْ عَــالِي مِـبَـانِـيـهْ لَلـسَّــاسْ

[الشبرمي]

انا في الصين حاشرني هواها
.................................. ودخاخين المصانع في سماهـــــــــــــا

[الصحاف]

آسفين يا ابو ريم على التأخير


لي فترة ما دخلت المنتدى


وشكلي برّدت الموضوع لذلك تراني منسحب .
..


يمه اللي حب له طفله صغيره ===== وش يسوي لاغدا فيها طلايب.

ناصر القحطاني

[سعد العبود]

عادي يا الصحاف .................

ومافيه شيء يبرد نصخنه في موضوع خاص في الشعبي ..............

مسكين يابغي من التتن نوماس@@تبي المعزة من سموم مظره
تصغر بعين اللي يعزك من الناس@@ اللي يعزك بالحزن والمسرة

[فتاة الشبرمية]

ليش المشاركات ضعيفة هنا رغم الإلحاح :
ينخاكم الكاسر على الشعر والقاف ### تكــفـون ياهـل العـبل بالغـنـيـمـة
قولوا الشعر كما سعـد والصحـاف ### خلوا الكسل ترى السراير سليمة

[الصييفي]

أما اوضعوا لي بيوت الشـعر موزونة @@ والا اتركوا لشعر للي يازن القافي
أهل الهـوى يعرفـون الما و يردونـــه @@ و لا يسـالوا فزعة من واحدٍ حــافي

[سعد العبود]

الله على اللي يجر الصوت بلحونه@@ مطفي النور ولع نور كشافي
يقول ما ابغى هل المنقود يدرونه@@ اوزي الوجه و اوريهم اكتافي

[الكاسر]

عديت في مرقباً والليل ممسيني *** في ديار غرباً يا عل السيل ماجاها
ومشكور على التفاعل
مع الموضوعاكثر من اول
فتاة الشبرمية
مشكور اختي
ينخاكم الكاسر على الشعر والقاف ### تكــفـون ياهـل العـبل بالغـنـيـمـة
قولوا الشعر كما سعـد والصحـاف ### خلوا الكسل ترى السراير سليمة
صح لسانج

[الصحاف]

ياليتني والغضي في راس مقصورة..... مقصورةٍ لو تهقوا الطير ما جاها

[سعد العبود]

و أحذر تقول ان التتن عدل الراس @@ اللي يقوله ناقص العقل غره

[الصحاف]

وش تقول يا سعد للي يقول:

سلّط على الدخّان لو هو مضري.... له حزةٍ عند احتكام المصيبة

ووش تنصحه فيه الله لايبلانا وياكم والمسلمين

[سعد العبود]

يالصحاف تدري وش اقول له:

انا من اللي قال ذاك متبري.......واقول يوم البعث ربي حسيبه

والله يهدي غيره من يمشون على جرته والا هو الله يرحمه برحمته .................

[الصحاف]

الله لا يهينك يابو ريم

طيب وش تقول للي يقول: ووالله اني نسيت اتلاه يقووووووووول:


في ليلةٍ فيها العفاف متوفي ***** ..................................


ووش تنصحه فيه

ياشباب المنتدى لاتفرجون علينا شاركونا وخلو الكاسر ينبسط

[الصييفي]

الإخوة الأعضاء: أحيانا يحتدم النقاش أو المساجلة بين بعض الأعضاء، و هذا جيد ومفيد لكن إذا لم تنته في وقتها يضطر البعض إلى الدخول المتهور مثلي الآن بين الصحاف و أبو ريم فالرجاء الإختصار. "فلم هندي؟؟؟؟"
لهذا سأترك المجال لأبي ريم يكمل الناقص!!!!

[سعد العبود]

الصحاف جبه كله مهوب تعطيني شطر وتهملني;) ..................

لكن الله يستر على المسلمين :

سلط على النصراني اللي لقى الزيت@@يا عل نبع الزيت يعمي عيونه

والشطر الباقي كمله يالصحاف :D .......................


خشم الرعن خذ راحتك ترا مهيب مساجلة بس سوالف عادية ...............

والمجال مفتوح للجميع ...............................:)

[الصحاف]

سعد العبود ما أعرف كمالته والله

يا شباب للمرة الثانية أقول شاركونا ترا عادي




يا عميّر لا تجي درب الغرام ********** وكل شيٍ صار منكم منتظر

لا تجي درب الهوا وسط الزحام****** ولا يصيبك عقب فرحتكم قهر

[سعد العبود]

كنت متوقع ..................

لا تطب الموج وانت من الغشام## ثم يضربك تحت صطحه حدر

[الصييفي]

أنـت ياالصــحـاف ياعــذب الكـلام@@@ وأنت يابن عبود شِعركْ من دُرَرْ
أعطوا الاخوان فرصة في المقام@@@ و خلوا أشعارالغطو وقت السَّحَرْ

[سعد العبود]

ودنا نمشي على حسب النظام @@ بس لازم بالمجاكر نستمر
والدعاوي ضحك ومزوح و سلام @@ وانت منا يالرفيق المعتبر

تحياتي لك ياخشم الرعن ....................

[الصحاف]

أشكرك يا خشم الرعن

وأكرر شاركونا ياشباب


إنتبه والضرب يثر باللحام ******* والشعر ماهوب من ضرب القدر

[سعد العبود]

ليش يالصحاف وقت الاستلام ## في توالي الليل في وقت السحر

تحياتي.................

[الصحاف]

لازم انك تفهم المعنى تمام ******** ومانبي غلطتك دايم تستمر

افهم المعنى وحذرى لاتنام ******** والصغيّر لازم انّه يعتبر



تحياتي........

[سعد العبود]

خلنا نفتح مجال(ن) للأنام## مانبي من مر يمشي ويعبر


تحياتي.............

[الصحاف]

يا سعد انتظرت أحدٍ يشارك عقبك ولا شارك أحد

عشان نغير الموضوع لكن الظاهر ان الدعوا فينا فينا ولا تجرأت أكتب إلا عقب

الفجر يوم شفت ما رد أحد.

وان بغى يشارك أحد معنا الله يحييه,


إعتبر باللي سبقك من القدام ********* كان ضايع عندهم تلقى مقر

[سعد العبود]

مافهمت الوضع يالرجل الهمام ** جاهل(ن)في فحص تكوين الصور

حط ماتبغيه والدعوى كلام ** مابها شر(ن) ولا فيها غدر

[الصحاف]

ابوريم وصلتك الرسالة



طيب يا سعد ويا شباب المنتدى وش تقولو ن للي يقول:

وان جرفك السيل جعلك للعدام ********* يا عساك السم والموت الحَمَر

[سعد العبود]

:)

كل رجال(ن)يحرث بالهدام ******** فوق راسه يبيطيح ويندمر

[المستشار]

دارنا مثل العروس وكلنا خطابها
ـــــــــــــــــــــــــــــــــــــــــــــ من يبي شمس الشموس من يحب ترابها

[المستشار]

متأسف خشيت عليكم غلط بس اعذرونس يا سعد العبود والصحاف

[الصحاف]

ارفعها يا المستشار

والله لا خشيت غلط ولا شي وانا وسعد ندور أحدٍ يخاوينا ولو يغير القاف عادي

كلٍ يكتب اللي يبي

وأبرك الساعات والله يالمستشار اللي نقرالك فيها

وياليت شباب المنتدى جميعاً يشاركوننا بهالفقرة.


ودي أزيد .. لكن به حشام **** ما يقولون الخطا طول العمر

ولد خالي رجل ما هو كالرخام** لاطلبته شي جاب امرك وسُرّ

[فتاة الشبرمية]

ياهلا بالوفد من عرض الكرام ### كل يــومٍ منتــدانا به خـبر
انت يالصحاف عندي لك سلام ### والعبود اليوم شعره معتبر
انتــم اللي تنعشـونـه بالكــلام ### للقديـم وللجــديد ومن عـبر
واعذروني على عمق الركاكة لانها بداياتي .
شكراااا .

[الصحاف]

كفو والله يا فتاة الشبرمية

الا ممتازة جدا , واستمري على ما أنت عليه وستكونين من شاعرات المنتدى,

ووش تقولون باللي يشكي على سعد والاخوان ويقول:

يا سعد قلبي تولع بالغرام ******* قلبي المكسور مَــــلقاله جبر

اعذر القلب الموشم بالكدام ******* ولو حصل لي قرب منهم منتظر

[فتاة الشبرمية]

الغــــرام اللي تولع به كلام ### لو تولع قلب مهمـوم احتضر
الهوى كنه تصافيق العظام ### ما ينومس صاحبه لو اعتصر

[سعد العبود]

من دخل وسط البحر شاف الظلام @@ وشاف به خير(ن) وشر وبه غدر
الهوى والعشق في نص النظام @@ مالقي له نص في خط الحبر

[الصييفي]

شــابت الابيات واشتد الزحام @@@ و كثرة الترديد يلحقها ضجر
قامـت الصــلاة واقدم يا إمام @@@ وانـتـبه للظهر لا تقرا جهــر
و سلام الجميع.

[محمد بن عبدالله]

ولي عجوز كل حي تعسه + حتى سفيهين العرب جايزله

[المتنبي]

أما أنا فأشارككم للمرة الأولى بهذا الشعر الرديء :
منتداكـم يا شباب احلا كلام ........ لا سبـاب ولا شتام ولا خَـوَر
منتداكـم مرتفـع مثل السـنام ........ فايـق(ن) بالنت عازف للوتَر
مكتمل صافي كما بدر التمام ........ جعل ربي يحفظه طول العمر
واعذروني على الخرابيط ، وترى أنا المتنبي ما أعرف إلا شعر عربي .

[سعد العبود]

ياهلا بك يالهمام ابن الهمام **** انت شاعرنا العريب المعتبر

تحياتي ...................

[الكاسر]

مشكور اخواني على التفاعل وخصوصا سعد العبود واخي الصحاف وباقي الاخوان ما قصروا وخذواهالبيت:
ما بقالك عذر وان مت باسبابك شهيد *** واكتبوا فوق النصايب توفى من هواه

[المتنبي]

يا سعد مانيب كفو للهمام ***** أنت شاعرنا كما وبل المطر
أخي الكاسر : حنا اتفقنا على هالطرق معذرة لك .

[الدكتور]

انت يا بن عبود يالشيخ الهمام @@@ لك تحيه على طول الدهر
وانت الصحاف لك ازكى سلام @@@ ياصلك يالشديد المعتبر

و العذر والسموحه على هالخرابيط اللي كتبتها وان كانت مكسوره ولامتعوره علمونا علشان نفيد و نستفيد:D ...تحياتي

[علي العجاجي]

قلت اتركوا سيل الهوى في مجاريه ****** لوكنت مخطي جايز(ن) لي خطايا

[هاني]

بيض الله وجيهكم ياشباب....بماان القاف شاب....اباابدالكم بقاف جديد


استلموا:

ياسعد ودنا تسمح اليوم نلعب قاف*****على شان الهواوي يشوف الرقم عالي

يشترك به جميع الربع وايضا الصحاف****ويسعد الله مساكم على كل الاحوالي

[الصحاف]

أشكرك يا أخ هاني وأشكر الجميع لاستنهاضي أناو سعد العبود , لكن عن نفسي حصل لي ظرف

جعلني لا أشارك بهذه الفقرة بالذات.


أستلم منك يومٍ الشعر يمشي على الكاف=تحتويني واحتويك وتجلس قبالي
مير خوفك من يجيك بردْ وهْوه ما يخاف=يحسبن الشِعْر هيِّن مثل ربط الحبالي

[الدكتور]

ودي اشارك اليوم بالمعلبه واخاف><>< الركاكة بوزن المعاني والامثالي

[سعد العبود]

يوم هاني بدا فكرته عادتي ماخاف = لو يغير بشكل الحقيقة والافعالي

شفت فالجو برق ضهر بارقه خطاف = بس ميزت وابل مزونه و انا سالي

[هاني]

تسلمون ياشباب ........استلموا:

ودناياهل المنتدى نطلع المشراف......وافطنوا للسفينه قبل تضرب الجالي

جيتكم ياجماعه ترا عندكم مصطاف.....اعذروا للمسافر على كل ما قالي

[همام]

تكفون يا اهل الدوج ماترتسبوني ++++ ماترتسبون اللي بلده بعيد

[الصييفي]

طرْقــكُمْ هذا صْعِيب و يتعب العــرّاف@@@ به مطبات اصطناعية تخوف سايق "الرالي"

بعضنا يلبس بيادي و يبحث عن لحافْ @@@ و البعض يمشي ببرد الشبط ما والله يبالي

[هاني]

مساء الخير ياشباب:

شفتِ خشم الرعن مابعد صوّب الاهداف....طقّ طبلونِ سيارته ماهو امبالي

انتبه يارفيقٍ اشوفك على ميهاف....خل ابو ريمِ يخبِركِ في بدع الامثالي

[سعد العبود]

كان خشم الرعن ما سمع نغمة العزاف= صعب يفهم على الذبذبه ذي والارسالي
فكرتك بينه للذي سمع ابونواف=قطع البيت تقطيع فني وتهتالي


الأخ / خشم الرعن ارجوا مراجعة الرسائل الخاصة في التحكم ..................

[هاني]

جزل يابوريم....وبيض الله وجهك ..استاذ بمعنى الكلمة

من تعجل ترى يمكن ايكسِّر المجداف***ثمّ يصبح غريقٍ بغبات الاهوالي

وش بلا الناس ياصاحبي تخلِف المحراف***والقضيّه تراها يا لا لِي لِي لا لا لِي

[سعد العبود]

ودنا نغير الطرق لكي يشارك الجميع :

انا باغير الموضوع ياهــــــــــــاني *** علشان الجماعة ما يطيقونه

واريد انشدك عن سكان الأوطاني *** وراه مخبـــي العيشة بكانونه

[هاني]

مساكم الله بالخير جميعا ...

الاستاذ/سعد العبود ...لاعدمتك يالغالي ...واللي تشوفه نمشي عليه ..ترانا عصا ك اللي ماتعصاك.


على ماترغبه والخدِّ ميداني"="نبي نسبح ببحر الشعر وفنونه

نبي نقطف زهر من كلّ بستاني"="وتعرف راعيَ العيشه بماعونه

[فارس تميم]

الله عليكم يا صحاف وياهاني=والله على سعد والدكتورمن دونه
والله على خشم رعن اذهلاني=ولايهون الاعضا كلن ومكنونه





والعذر من الجميع على المداخله المتواضعه

[الصييفي]

أنا محتــــار في تصريف قيفاني
----------------------- حماسي ضاع و الشعار مجنونــة
معي جـوال بالابراج مليـــان(ي)
----------------------- و بطــاريته يــا دوب مشــــحونــة
و إلى مني بغيت الخط ما جاني
------------------------ و رقيب الملعبة خنجره مسنونة
يردد قافية "يـا دان يادان(ي)"
------------------------ و هـذي القافية مهيب مضـمونة

[سعد العبود]

مشكور ياهاني الله يبيض وجهك وانت منتب توجه انت الموجه يا طويل العمر:

واستلموا يالربع :

هلال العيد لو غيب ولا باني=الى منه ضهر ناسه يشوفونه

والى من الولد ما ثبت الجاني=يقول ان البلد ماهيب مسكونة

[سعد بن سيف]

يانفس توبي فانا الموت قد حنا*****وعصي الهوى فلهوى مازال فتنا

[وطن عمــري]

لاجل قربك كتبت ولاجل بعدك كتبت * * * * مير ما كل حرفٍ يشرح اللي نريد

[الصحاف]

ما قول من يزبنك يلقى حواليك فيّ = أقول من هو زبنك أنشهد انه زبن
تدري وش اكثر مثل لامر تطري عليّ = الحيّ يحييك والميت يزيدك غبن

[عساف الصعب]

اولا اشكر الاخ الشبرمي على هذا الاطراء"الا ياليت منهو للمهار العاصية ("عساف")**يطوعهن على دروب المجافل لين يعـطـنـٌه.
واكمل واقول
وماحب الديار شغفن قلبي@@ ولكن حب من سكن الديار

[احمد]

أولاً السلام عليكم .
إنني أود أن أشارك في هذا البيت والبيت هو :
ناح الحمام بعاليات المقاصير.........وأهل الهوى طربين ما يسمعونه

[الصحاف]

يا طيب فعلك يوم اطالع بالافعال = انشهدٍ اللي يغلك تغله
يابوفهد تسن المراجل لك عيال = والطيب تسنه عود وانت ولدٍ له

خالد المريخي

[عساف الصعب]

ياحسين بلدان الجماعه مريفه&&وانا مع الاغراب كني على نار
الطير بالجنحان محلى رفيفه &&والا انكسر حدا الجناحين ماطار
يمنى بلا يسرا تراها ضعيفه &&ورجل بلا ربع على الغبن صبار

[الصحاف]

نسيتوا الكاسر وشو قايل

يبينا نحطم الرقم القياسي

ليش هالخمول........


ياراكبٍ خمسٍ وخمسٍ وتسعين** ومضربين الجيش ببعير جهجاه

وعشرٍ نصن شقرا ولا هوب يقرا ** ولاهوب يقرا خطنا وان كتبناه

وعشرٍ نصن الجوف ما هوب من خوف** مع المسايل جدة العشب ترعاه



لجدي مشعل بن عبدالله ( الله يرحمه )

[سعد العبود]

أحدٍ نصى جده وعود بشده***عود بشده والقرب يابساتي

بيت من احد قصائد (خالي سعد بن عبدالله العجاجي)

[الصحاف]

والا نروح يمة القصر ثنتين **** قصر الحزيمية غطاه الغمامِ

ولقن خفيش الريم ظبي البساتين**** أبو نهيدٍ مثل بيض الحمامِ


لعمي سعد بن عبدالله بن مسعود (مشيعل)

[سعد العبود]

حالفن ما انساك يالعود اللياني*** لو يشد النير يم الشبرمية
لو تشد هضاب صبحى لذهلاني *** حالفن مانساك دام النفس حية

ابراهيم بن سعد اليحيى (الهواوي)

[الدكتور]

يا ليت ربي ما خلق ولف وافراق
...............................والا خلق حبٍ على غير فرقا

[ابودحيم]

كم ليلة من بالغ الشوق غنيت @@@ امجاوب طير الهواء كل ماناح
(دحـــمــــان)