المساعد الشخصي الرقمي

مشاهدة النسخة كاملة : القضاعي كلمة راس

$البطـ777ـران$
06/03/2004, 12:06 PM
اخوي الشاعر القضاعي يشرفني اللعب معك طال عمرك

واستلم لاهنت :


ياسلام الله سلام (ن) للجماعه = قالها البطران والباقي على الله
اطلبوا لي من تسمّى في قضاعه = يكشف الغطيان والباقي على الله
ابوهـيـف
06/03/2004, 12:56 PM
يا سلاام عليك يالبطــران بدايه رائعه لا والطرف الثاني الرائع القضاعي

يعني بيكون في الملعبه بــــطــــرانين اثنين مهوب بطران واحد

واصلو وازهلوا الصفوف
القضاعي
06/03/2004, 01:50 PM
الاخ العزيز والشاعرالكبير البطران ابرك ساعه طال عمرك ويشرفنا اللعب
معك
ابوهيف شكرااا لك يالغالي ومرورك شرف للجميع
واستلم طال عمرك
مرحبا يامرحبا سمعٍ وطاعه"="ياصلك ذيبان والباقي على الله

هات كفك بيننا ماهي قطاعه"="كلنا زيدان والباقي على الله
علي العجاجي
06/03/2004, 01:54 PM
البطران والقضاعي

كفو والله وبيض الله وجيهكم شدوا حيلكم وارقدوا عن الصفوف كلكم غالين وعلى العين والراس
شعراوي
06/03/2004, 02:24 PM
الشاعر
البطران
والشاعر
القضاعي
تسلمون على المحاوره
وبين محاورتكم سوف تكون
من المحاورات القويه بدون
عواصف وهذا هو المرغوب
عند اللي يحبون الديره واهلها
بيض الله وجيهكم كلكم شعار
وازهلوا الصفوف
واصلوا

لاعدمناكم

سلاااام
محمدبن سيف(ابوعبيد)
06/03/2004, 02:25 PM
السلام عليكم ورحمة الله وبركاته
البطران ،القضاعي الله يوسع صدوركم على المحاوره الجميله
استمرو وعجلو والصفوف ارقدو عنها:)
المشهاب
06/03/2004, 02:40 PM
البطران والقضاعي

لكما مني ارق تحيه

بيض الله وجيهكم


وصحت السنتكم على الكلام الجميل والثقيل في نفس الوقت



استمرواااااااااااااااااااا والله يرعاكم


واتركوا الصفوف علينا يالمتابعين



وصفكما واااااااااااااااحد
الناقد
06/03/2004, 03:23 PM
الشاعران الكبيران

البطـــــــران والقضــــــاعي

كفو وبيض الله وجيهكم يا مال العافيه

وترى الجميع قاضبين الصفوف مناصفه من غلاكم

والباقي على الله
الصييفي
06/03/2004, 06:33 PM
يا الله تحيي الشعار. البطران و القظاعي روحوا و خلوا الصفوف علينا. أنا هالمرة أبصير بصف البطران و لا يهون القضاعي. روحوا وخلونا نستمتع بجو الرد الأصيل.
$البطـ777ـران$
06/03/2004, 06:55 PM
ابوهيف

ابوابراهيم

شعراوي

ابوعبيد

المشهاب

الناقد

بيض الله وجيهكم والله لايهينكم عزالله تو مازان اللعب

القضاعي ارحب ثم ارحب واستلم لاهنت :


البقا للي سمعنا ابظرف ساعة = امعط (ن) مالان والباقي على الله
مير اخاف الذيب يقنب باندفاعه = سمِّ بالرحمن والباقي على الله
$البطـ777ـران$
06/03/2004, 06:58 PM
هلا والله ابخشم الرعن شرفتنا بحضورك سواء بصفي والا بصف

اخوي القضاعي الله لايهينك


اخوك البطران
القضاعي
06/03/2004, 10:30 PM
ابن العم الغالي علي العجاجي بيض الله وجهك ولا عليك زود يالغالي

ابن العم الغالي ابوعبيد بيض الله وجهك ولاعدمتك يالغالي

العم الغالي خشم الرعن بيض الله وجهك وحظورك شرف للجميع طال عمرك

العم الغالي شعراوي بيض الله وجهك ولا نستغني عن حظورك لاعدمتك

العم الغالي الناقد بيض الله وجهك على الحظور وحظورك شرف لنا طال عمرك


الغالي المشهاب بيض الله وجهك على الحظور لاعدمتك

استلم يالبطران جعلي مابكيك

متعبن للخيل ياراع الشجاعه"=" تكعم العدوان والباقي على الله

واعرفن القرم مايكسر ذراعه"="كلبونا اخوان والباقي على الله
محمد السعيدي
06/03/2004, 11:45 PM
ياهلا بالنشامى حيّهم وحيّ طاروقهم الحيّ

واصلوا لاهنتوا والمتابعة علينا
المشهاب
07/03/2004, 01:39 PM
مير اخاف الذيب يقنب باندفاعه@@ سم بالرحمن والباقي على الله






متعبن للخيل ياراع الشجاعه@@ تكعم العدوان والباقي على الله


البطرااااااااااااااااان و القضاااااااااااااااااااااعي


واااااااااااااااااااااااااااااااااااااااااصلواااااااااااااااااااا



والصف ازهلوه لجمهوركم جعلكم تسلمون كلكم
$البطـ777ـران$
07/03/2004, 05:52 PM
محمد السعيدي بيض الله وجهك يالبناخي والله لايهينك

المشهاب يامال العافية تسلم على المتابعة

الله الله القضاعي استلم لاهنت :


مايشّد الواحد او يرخي شراعه = للسفن ربّان والباقي على الله
للجماعه حبل مانبغى انقطاعه = ضمّنا ثهلان والباقي على الله
القضاعي
08/03/2004, 12:42 PM
البناخي محمد السعيدي بيض الله وجهك على الحظور والمتابعه يالغالي ولا نستغني عن حظورك لاعدمتك

الغالي المشهاب بيض الله وجهك على الحظور والمتابعه ومسكة الصف لاعدمتك

استلم يالذيب واسف على التاخير لاعدمتك
واجبٍ البيت ماترخى رباعه"="ترفع العمدان والباقي على الله


ومن ركض بالتفرقه يفصم خناعه"="يكمرالفسقان والباقي على الله
$البطـ777ـران$
08/03/2004, 01:25 PM
مابطى من جا ومعذور استلم لاهنت :


خابرن فرعون مالحق الشفاعه = لاولا هامان والباقي على الله
غرس نخل ابلا ثمر ماهي زراعه = مانبي عيدان والباقي على الله
القضاعي
08/03/2004, 02:58 PM
استلم يالبطران لاهنت
طاغيٍ فرعون مافاده صراعه"="بالبحرغرقان والباقي على الله

كل طرقيٍ على قده متاعه"="جايع وشبعان والباقي على الله
$البطـ777ـران$
08/03/2004, 06:06 PM
ايييييييه خلوووووووووووووها

استلم يالقضاعي:


البلا باللي يِجاهر باتّباعه = غرّه الشيطان والباقي على الله
السفيه اليا تردّى بالوضاعه = شبّعه حقران والباقي على الله
القضاعي
08/03/2004, 07:17 PM
اييييييييييييييييه .......

استلم يالبطران لاهنت

اسمع......اسمع
تابعه تبعٍ ولاعنده قناعه"="مفتحٍ عميان والباقي على الله

الخبل عن شوفته يكفي سماعه"="تسفه الورعان والباقي على الله
$البطـ777ـران$
09/03/2004, 02:47 PM
استلم يالقضاعي لاهنت :


قلدّوا صنعه ولافيها براعه = والله الغشمان والباقي على الله
يحسبونِ الناس تجهل بالصناعه = "وارد التيوان" والباقي على الله
ابودحيم
09/03/2004, 05:07 PM
بسم الله الرحمن الرحيم

ما قصرت يالقضاعي و ما قصرت يالبطران و انا اشهد ان كلكم بطرانين;)

تحياتي
القضاعي
09/03/2004, 07:13 PM
ابو دحيم لاعدمت على المرور وهذي ابرك الساعات اللي شرفتنا يالغالي

البطران استلم لاهنت

اسمع....اسمع
انتفخ شارون من قو الاذاعه"="نفخةالصملان والباقي على الله


كل تاجر عارفٍ نوع البظاعه"="يفرق الريحان والباقي على الله
$البطـ777ـران$
10/03/2004, 02:09 PM
ارحب يابودحيم تشرفنا بمتابعتك يالبناخي

استلم ياولد العم :


بثِّ رعب (ن) بين خلق الله وشاعه = مالقى عربان والباقي على الله
من يسوم الدونِ راعِ الدونِ باعه = سومة الخِسران والباقي على الله
الصييفي
11/03/2004, 01:30 PM
الأخوة "البطران" و "القضاعي" ما قصرتوا و أظن الرسالة وصلت. وش رايكم؟: أرجوا أن تتحملوا "طباتي الرأسية" المعتادة!.


يا وكيل المطبعة وقّفْ طباعة= اللِّزَمْ قِدْ حان و الباقي على الله

القماشْ مْسعّرٍ "شبره" و "باعه"= و لا حدٍٍ كسبان و الباقي على الله


ولكما و للمتصفحين التحية
الريان
11/03/2004, 08:50 PM
السلام عليكم ورحمة الله وبركاته

يعطيكم العافيه وماقصرتوا وصح لســانك يالبطران ويالقضاعي


وعلى ماقال خشم الرعن الرساله وصلت وماقصرتوا.


تحيّاتي للجميع
$البطـ777ـران$
12/03/2004, 07:26 AM
الاخ خشم الرعن

وصلت بالبريد العادي والا الممتاز ابووليد تمون يكفي انك ضابط صفي

عالعموم من ناحيتي ماعندي اشكال هذا اخر رد لي بما اني راعي

الطاروق اما اخي الشاعر القضاعي فله الحق برد اخير ان اراد.

تسلم يالغالي

اخي الريان تمون ايضا يالبناخي وماطلبت شي .

تسلم يالغالي

اخوكم البطران
القضاعي
12/03/2004, 10:29 AM
بسم الله الرحمن الرحيم

السلام عليكم ورحمة الله وبركاته

العم الغالي خشم الرعن اسعدنا مرورك الكريم لاعدمتك واللي تامرفيه هو المبارك

و من العين قبل الاخرى

الريان مرورك شرف للجميع طال عمرك


البطران فرصه طيبه وشرف لي اللعب مع شاعر بمستوك وبجزالتك

لاعدمتك والاحتكاك بشاعر مثلك يزيدويصقل المواهب واشكرك على

دعوتك لي وطلبي للعب معك لاعدمتك

وامل ان اكون عند حسن الظن يالغالي

والعذروالسموحه ان حصل منا قصور يالغالي

والى اللقاء في محاورات

اخوك القضاعي
$البطـ777ـران$
12/03/2004, 01:21 PM
الشاعر الكبير القضاعي

صح لسانك مليار يالبناخي والشرف لي طال عمرك اني العب معك

ومجمل ولاجا منك قصور ...الا انت اللي سامحني ان كان جا مني شي

واعلم اني ماناديتك الا عشان استفيد من اللعب مع شاعر مثلك وهذا

اللي صار يالقرم .

الى لقاء قريب باذن الله

اخوك البطران
الناقد
14/03/2004, 10:39 PM
الشاعرا ن الــكـبـيـرا ن

البطران// القضاعي

كفـيـتـو ووفـيتو

بدايـة ونهـايـة

شعرا ونثرا