الأمثال الشعبية

[بنت الشعراء]

بسم الله الرحمن الحيم,,,

اعضاء منتدى الشعراء الكرام,,,

هذي مشاركة بسيطة وارجوا انها تنال استحسانكم... وهي عبارة عن شرح الأمثال شعبية...

يعني انا الحين بحط مثل شعبي لكم والي بعدي يشرحة ويقول متى

نستخدمة....واذا شرحة الي بعدي يحط مثل ثاني

والي بعدة يشرحة وكذا ارجوا انكم تكونون فهمتوني...

وهاكم المثل......

(((أذن يا بلال وربك الله)))

يلة الي بعدي يشرحة ويحط مثل تراه بسيط مرة هالمثل:) :) :)

[براق الخريف]

أختي بنت الشعراء مشكورة على هالفكرة.
المثل فيما أظن يقال لحث الشخص على الاستمرار في عمله وترك مايسمعه من
تثبيط ونقد.
والله أعلم.

المثال:
يقال : (فلان حصان جرفان) متى يقال؟

[سعد العبود]

فلان حصان جرفان ..............
اعتقد انه يطلق على الشخص الذي لا يهتم من شيء مثل ما يقولون يطامر الجرفان ..................

المثل :
(احصد هوى وغمر ماش)متى يقال؟

[الرازي]

احصد هوى وغمر ماش
صراحة اول مرة اسمع به
بس شرحه بسيط يعني اللي يحصد الهواء ماهوب لاقي شي
مثل الاحمق اللي يبي يعاون الحطاب كلما طق قال الاحمق : هه ويبي اجرة وسّمعه القاضي صوت الدنانير وصار صوتها اجرته

المثل الجديد :
الى كذبت فسند

[ابو قصي]

معناه اذا كذبوك الناس في خبر انت سامعه علمهم من اللي قال الخبر
يعني اذاقال لك فلان من الناس انه صار شي في المحل الفلاني و انت نقلت الخبر للناس وحسيت انهم ماصدقوك في هالحاله اسند الخبر للقائل الاول

من قد الحصاة

[محمد]

يعني من دونها وهو يقال من باب التكذيب


المثل
( لا تقول حب لين توكي عليه )

[الصييفي]

المثل يعني أنك لازم تتأكد من نتيجة البحث أو العمل وتحصل على شىء ملموس(الهدف) ولا تتكل على الغير.

المثل:
"اللي بالقدر يظهره الملاس"

[محمد]

المقصود ان الشي بيبين ويظهر للناس وسوف يظهره الله مع مرور الأيام

المثل وهو عبارة عن بيت
( مسكين يا طابخ الفاس ****** ترجي المرق من حديدة

[سعد العبود]

يقال هذا المثل بمن وضع الشيء بغير موضعه أو انه ينتظر فائدة من شيء وهو معدوم الفائدة ....................
المثل:
من عديلك يا ابوبرجس

[الصييفي]

"من عديلك يبو برجس"

المثل يعني أن الخسارة عليك

[سعد العبود]

الأخ / خشم الرعن وين المثل؟

على العموم اسمح لي بأن اضع مثلاً نيابة عنك..............

المثل:
راحت دار برامكه

[الصييفي]

"راحت دار برامكة"
هذا يعني و الله أعلم: صارت خبيصة، كلٌ إيده إله، فوضى

المثل:" الذيب بالقليب"

[سعد العبود]

يعني تحقق هدف او وصول خطر وله استعمالات كثيرة والله اعلم ....................


المثل.....................................
مغيولان مديفنان ...............:confused:

[ميلاف]

اللي بالقدر يظهره الملاس ...اكره مثل عندي..

الشبكه تعير المنخل...

[ابو قصي]

اخوي سعد ما عرفت وش يقصد المثل وميلاف طمرته و تكلمت عن اللي قبله بواجد

ومثل ميلاف يقصد فيه ان شخص ينتقد اخر بشي وهو يسوي اشين منه
مثل واحد يقول ترا فلان كذاب او اي شي من هالقبيل وهو عميد الكذب او اللي غيره
والشبكه هي مجموعة اسلاك مترابطة مع بعض مع وجود فتحات كبيره ( مثل شبكة صيد الاسماك او شبكه باب الكوره ) و المنخل اداة تستخدم لتصفية الحب من الاتربه و العوالق وايضاً يستخدم لتصفية الطحين من العوالق الغير مطحونه وهو عبارة عن مجموعة اسلاك مترابطه مع بعض مثل الشبكه بس بفتحات صغيره جداً

مثل اليوم
افقر من الحجام

[ميلاف]

هذا والله العالم انه يعني ما عاد ورا... داقه الفقر لين اذن.وان تساني مانيب واهم: انه الحجامين هم افقر الناس منول.. هذا ان كاني قاريها زين... لان القران(القراءة بلغة اهل الشعرا القديمه) الله بالخير..

المثل ....

قف يا ثور..

وتنطق بازاي النجدية(ليت في الكي بورد) متساتسا تسان صار الحتسي اسهل..

و شكرا

[محمد]

معناها انه يضرب هذا المثل للفقير الي ماعنده شي لأن الحجام ما اشتغل هالشغلة الا لانه مامعه شي .

المثل يقول

إلى صرت جمال واعد عشرة

[سعد العبود]

معناه انك اذا صرت تبي تشيل حمل على جملك واعد عشره واللي تلقاه الاول شل حمله مهوب تتفق مع واحد ويوهققك يقول والله هونت اليوم ثم تخسر حمل بعيرك اليوم.وتطلق في حالات اخرى في نفس السياق.............

المثل...............
مثل فقير النصارى....................