المساعد الشخصي الرقمي

مشاهدة النسخة كاملة : سعد العبود . ضيف جديد يطلبك

فيصل
01/08/2004, 05:14 PM
سلام مني على أعضاء المنتدى والضيوف = اعداد من يمم الكعبة ومن طافها
نادوا سعد نادوا اللي يمسكون الصفوف = حتى المعاني تزين وتكمل اوصافها
سعد العبود
02/08/2004, 01:59 AM
حياك الله يالضيف ووجودك شرف واللعب مع شرواك مكسب

استلم لاهنت :

يا مرحبا يالمسلم لو منت معروف=واثني التحية وراعي الشين ما شافها
على الطلب حاضرين إيلين نبري الحسوف=ونشوف صرف المعاني عند صرافها
فيصل
02/08/2004, 04:58 AM
استلم يا ابو ابراهيم

امنولٍ في خيالك كل ليله تطوف = ما بين سمحان والمسقاة واطرافها
واليوم خاويت راعين الطرب والدفوف = وسكتك ذيك القديمة قمت باحرافها
فارس تميم
02/08/2004, 10:13 AM
الله الله

يعطيكم العافية ياشباب وشدوا حيلكم تكفون ،،

وانا ماسكن صف رئيسي ابو ريم ;) والله يقويك ياشاعرنا الجديد فيصل....

ونور المنتدى بمشاركاتك
الرازي
02/08/2004, 11:19 AM
الله يقوي شاعرنا الجديد فيصل
ولا يهون ابو ريم
وانا ابمسك صف فيصل
الصييفي
02/08/2004, 11:20 AM
الإخوة الشعار:

فيصل: حياك الله في المنتدى و نحيي فيك إندفاعك للعميق مباشرة مع مراقبنا العام.

أبو ابراهيم: شد حيلك، يظهر ان الأخ فيصل مهوب سهل.

أنا هالمرة بصفك يا مراقبنا.

و يا هلا
علي العجاجي
02/08/2004, 02:02 PM
الشاعر فيصل حياك الله في ميدان المحاوره وقدومك ينبىء عن شاعر كبير متمكن
ابو ريم شد حيلك شاعرنا فيصل مهوب هين ولاتهون ودنا نشوف ميدان المحاوره كما عهدناه مليان بالشعار.

والله مدري من اجي بصفه لكن الضيف له حق وانا بصف فيصل
سعد العبود
02/08/2004, 03:32 PM
فارس تميم :
حياك الله يالمساعد :D وبيض الله وجهك على قضبة صفي وحق وواجب.......

الرازي:
مرحبا مليون يكفينا مرورك ومرورك العذب عطر المتصفح بأي صف كنت ......

الخال خشم الرعن :
وجودك يشرف والله يعينا على فيصل والحمد لله إنك هالمره بصفي ...........

علي العجاجي :
أول شيء الحمد لله على السلامة مرورك شرف للجميع ووجودك اليوم أثرى المنتدى وسيثري الميدان وصدقت الضيف يستاهل .................

فيصل منتب بسيط استلم لاهنت ;) :

هذا اعتقادك وبعض الناس ما معه شوف=مايدري إن الحقايق عند عرافها
أنا مع الربع دايم يا عديم الوصوف=ما اغير السكة اللي سابقي حافها
محمد السعيدي
02/08/2004, 04:53 PM
بسم الله الرحمن الرحيم

انا مع الربع دايم ياعديم الوصوف ** ماغيّر السكة اللي سابقي حافها
صح لسانك يابو ابراهيم , وانا بصفك لاعدمتك, من غير قصور بالشاعر فيصل
فيصل
02/08/2004, 05:08 PM
الاخوة فارس تميم والرازي وخشم الرعن وعلي العجاجي ومحمد السعيدي
شاكر لمروركم وتفاعلكم

استلم يا ابو ابراهيم

من شاطي البحر الأحمر لين حد الهفوف = دلوا به التايهين وتاه وصافها
متى على الله يزين الوقت والا يروف = واهل الدسايس تشتت داخل احلافها
سعد العبود
03/08/2004, 02:17 AM
الشاعر محمد السعيدي :
لا عدمتك يا سنايدي مشكور والله على قضبة الصف ومرورك عطر المتصفح ......

فيصل استلم يا النشمي :

من بادي الوقت الأول لين فتح الظروف=ناسٍ تكشف على العالم بكشافها
ماتدري أن السوالف بينه للعروف=المشكلة من يظم الخلق بخلافها
فيصل
03/08/2004, 05:21 AM
استلم يا ابو ابراهيم


دعوىً حقيرة ولا تاصل لسل السيوف = الرابح اللي ليا من نجست عافها
بانوا هل الكذب لو هم يكثرون الحلوف = من يوم ما بان خايطها وقيّافها
hotmail
03/08/2004, 11:37 AM
دعوىً حقيرة ولا تاصل لسل لسيوف
..........لرابـح اللـي ليـا مـن نجسـت عافـهـا
بانوا هل الكذب لو هم يكثرون الحلوف
.........مـن يــوم مــا بــان خايطـهـا وقيّافـهـا


الله الله
بالخير يا شاعرنا الجديد فيصل

وانا بصفك ولا يهون سعد

شعللوها
الدكتور
03/08/2004, 12:36 PM
الله يقويكم يا جماعه
و انا اشهد انكم شهويتوني ;)

شعللوها يا الربع
و انا بصف سعد ولا تهون يا فيصل
سعد العبود
03/08/2004, 01:47 PM
هوتميل :
حياك الله يا الغالي ووجودك شرف بأي مكان كنت ........
الدكتور:
يمال العافية ومرورك شرف وقضبتك لصفي مكسب يالغالي.....

فيصل سم طال عمرك :

لو كان مابه حكومه كان محدٍ يروف=تشوف روس الجماجم عند نتافها
بانوا هل الكذب والخدعة عساك مخلوف=تلقى عن الأوله خمسين بأوصافها
فيصل
03/08/2004, 04:26 PM
الاخوة هوت ميل والدكتور . شاكر لكم على التفاعل

استلم يا ابو ابراهيم


عز الله انه تبيّن فالشوارع يطوف = وبغى يوجه لساحرها وعرافها
ولو كل شيٍ تغيره الصدف والظروف = لا جا المواقف تبين الناس واصنافها
$البطـ777ـران$
03/08/2004, 07:16 PM
الله الله واصلوا

وابامسك صف ضيفنا الجديد مع ابوحسين

وينك يابوريم الليل الليل
سعد العبود
04/08/2004, 03:02 AM
$البطـ777ـران$ :
هلا والله وغلا يا مرحبا مليون أنت بس تعال عندنا والصف اللي تبي نجي معك فيه لوه ضدنا اهم شيء لاتقاطع ياشاعرنا الغالي .........

فيصل استلم يالجزل :

لا تظلمه يا عميل الخير رجلٍ عطوف=يحب خير العرب ويمطخ اكتافها
عز الله إنك صدقت ولو غلقت الولوف=ماكان بين دركتلها وجرافها
فيصل
04/08/2004, 03:39 AM
الاخ البطران . شاكر لحضورك

استلم يا ابو ابراهيم


والله لولا الحيا اللي حدني للوقوف = والا ان يموتون ما يلحقهم اسعافها
مير اني ابقى عن دروب الجهاله عزوف = والحل واضح ولا ارضى الحل بانصافها
سعد العبود
04/08/2004, 05:03 AM
استلك يا فيصل :

ناسٍ يقولون وش حد العرب للنكوف=وناسٍ يقولون خل القوم واسيافها
بس الحقيقة تبين نوع صرف الكشوف=تنظيم حقق طموح الخلق واهدافها
ابودحيم
04/08/2004, 09:32 AM
يــــا ســـــــــــلام يا جماعه

قواكم الله ...وانا بصفك يا فيصل

و لا تهون يــــا سعد

واصلوا واصلوا يا مال العافيه
فيصل
04/08/2004, 03:48 PM
ابو دحيم . شاكر لحضورك

استلم يا ابو ابراهيم


من فضل رب السما انه ما يدوم الكسوف = والحق يظهر ولو غطوه بلحافها
لكن ترى اهل الحسد فالدار فوق الالوف = ولو دونوا لك جميل القول بصحافها
سعد العبود
05/08/2004, 03:36 AM
ابودحيم هلا وغلا مرورك شرف بأي صف كنت ..........

فيصل استلم وأشكرك على طلبي لهذه المحاورة مع أمنيتي بأن التقي معك قريباً :

الحمد لله شفت الكتب فوق الرفوف=شفت الكتب عند بعض الخلق بأرفافها
وازيدك اهل الحسد قدمك وخلفك تلوف=لكن خلق حذيق الراي كشافها
الغزال
11/08/2004, 03:05 AM
ماشاء الله الله يقوييكم ايها الاخوه