الأخ سعد العبود، مطلوب وعلى عجل

[الصييفي]

الأخ الغالي "أبو سف" أرجو أن تشاركني هذا المشوار الهادف و هي سداسية الأبيات حتى نضمن إكتمال اللوحة:



يبو ابراهيم أنا ودّي أغنّي مِعْكْ مِرواس= مرواس ما فيه غطو و ودنا كل(ن) يشوفه

لا شفت أنا بعض جيل اليوم، صار البال محتاس= نوهاته قريبة، وسطى، و لا يرضى الكلوفة

زود(ن) على خيبته يمشي "مبوِّز" مثل "جساس"= يومه غدر في كليب بطعنته من عقب خوفه

يطلب مواتر جديدة ثم يمشي شامخ الراس= يا كيف و العود يدفع قسطها من دم جوفه؟

البعض منهم كبير و لا يحوِّش سعر الامواس= اللي يعدّل بها سكسوكته قبل البروفة

يدور الاسواق مع "ربعه" بقِزْعِه لابس(ن) لاس= في يده "بندا" و الاخرى شغلها ترمي قطوفه

و يا هلا

[العامري]

الله اكبر الله اكبر الله اكبر

يا سلام يا سلام

صح لسانك مليار

وفي انتظار مجارات ابو يوسف

قصيدة جزلة من جزل


يبو ابراهيم أنا ودّي أغنّي مِعْكْ مِرواس=مرواس ما فيه غطو و ودنا كل(ن) يشوفه


لا شفت أنا بعض جيل اليوم، صار البال محتاس=نوهاته قريبة، وسطى، و لا يرضى الكلوفة


زود(ن) على خيبته يمشي "مبوِّز" مثل "جساس"=يومه غدر في كليب بطعنته من عقب خوفه


يطلب مواتر جديدة ثم يمشي شامخ الراس=يا كيف و العود يدفع قسطها من دم جوفه؟


البعض منهم كبير و لا يحوِّش سعر الامواس=اللي يعدّل بها سكسوكته قبل البروفة


يدور الاسواق مع "ربعه" بقِزْعِه لابس(ن) لاس=في يده "بندا" و الاخرى شغلها ترمي قطوفه



كلام كلام

[سعد العبود]

الغالي عميد المنتدى خشم الرعن اشكرك جزيلاً على الاهتمام والحرص على هذا المنتدى واثني عليك الشكر بحرصك العام على المجتمع وما يحدث به من مظاهر افرنجيةٍ مشبوهة وسلمت لي بهذا الطلب للمشاركة............
وعذراً على التأخير

العامري مرورك يسعد الجميع أيه الجزل ......

استلم يا أبا الوليد :

أنا على ما طلبته جاهزٍ في كل مقياس=و أنا على اللي تريده لينك تبَري الحسوفة
في كل وقتٍ رجالٍ طيبينٍ مير لاباس=اصبر ترا الصبر طيب لجتمع هو والمروفة
الجيل واحد لكن الوقت زادت فيه الأدناس=اصبح بوسطه قوانين الردى داخل صفوفه
ولو قلت له ويش ابك قال الزمن يا طيب الناس=كلش تغير ولكن التطور له ظروفه
وبعض العرب صاحيٍٍ فكره وابد ماهوب منحاس=له عين، واعي، وله نيه سليمه ومعروفه
هذاك سعره مثل سعر الجواهر سعرالألماس=الله يجيبه لدار الطيب ويكثر صنوفه
ويا مرحبــــأ

[عساف النجايب]

الشاعر القدير خشم الرعن والشاعر سعد العبود

الله لايهينكم على هالأبداع ...احيوا المحاوره الله يحييكم

واصلوااا وازهلوا الصفوف الله يعافيكم

[الصييفي]

الأخ "العامري":
مرحبا بك و تواجدك يثري الساحة دائما،
فلك مني كل تقدير على هذا التواجد.

الأخ"عساف النجايب":
أشكرك على تشريفك و كلماتك الرقيقة
التي توحي بنبلك و طيبة معدنك،

أبو يوسف:
أشكرك على إجابة الدعوة، و لا أبطى من جاء،
إستلم لا هنت:

والنّعم، أنا عارفك للطيب و الطولات نبراس= رجل(ن) تميّز، و خطواتك على الخير معسوفه
حاشا، تراني على التعميم ما دقّيت الاجراس= و الصبر ياقف على بابي بقبضاته يدوفه
و الارض تنبت إلى جاها المطر حنظل و بسباس= و الوقت مهوب يازينه و كاثرة(ن) صدوفه
و اعرف شباب على درب المراجل جوّد الساس= و ياصل للاهداف في مسعاه لو فيها حتوفه
همي من اللّي معلق في المَعَرْفَة لوحة افلاس= و يزوم نفسه على الفاضي، و خالية(ن) كفوفه
ما يعرف ان الرّخا مادام لاهل الملك و الباس= و لا خذ العبرة من اللّي مضى و اللّي يشوفه
و يا هلا

[سعد العبود]

عساف النجايب : هلا وغلا مرورك تشريف للجميع ولك الشكر على مسكة الصفوف يالغالي

ابووليد استلم ياطويل العمر :
:

والك الثناء زود ياللي راكبن من فوق الأفراس=دايم لك أفكار وتميزك عن ناس عروفه
وقتٍ عجيب ويغيرياجماعة راع الاحساس=لكن عسى الله يرتب كل عقلٍ في رفوفه
كلٍ نعرفه ولكن موتنا من مسقي الكاس=خصٍ ليا اسقاه من كاس البلاوي والكلوفة
الله يقطعتس يا رفقة ندامه مالها ساس=هي سبة اللي يجي بعض الشباب من النكوفة
كل(ن) يناظر لروحه لا يناظر كل الاجناس=المشكلة لا جته بلواه في مثنى كتوفه
والجوهر الجوهر الطيب صعيبٍ يقلب نحاس=خلقه ربي من الغالي وبيعته مخلوفة

ويا مرحبــــأ

[الصييفي]

أبو يوسف:
عز الله ما قصرت،
وأشكرك كل الشكر على تلبية دوعوتي
في هذه الجولة المختلفة،
و التي ما شاركتنا فيها الصفوف كالعادة
إستلم لاعدمتك:
.

أنا أشهد انك تجيب البيت عنوة، منت خلاس= اتعسِّف القاف عسف(ن) يا رفيقي فيه توفه
الوقت يا صاحبي لا نظلمه في كل مجلاس= نرمي عليه العَتَب و احنا السبب فيما نحوفه
نارد بكامل قوانا يا رفيقي كل فنطاس= من غير تمحيص نشرب منه و العين مخطوفه
و الى ثملنا بدينا نضرب أخماس(ن) بأسداس= و نلوم ما جا بدرب الذّل و نوثّق كشوفه
يا صاحبي كل ما يحوي القِـدِر يظهر بملاس = و بعض النتايج تبي تصير مهيب محفوفة
و الضب ما ينفعه جحره، يصيدونه بمكناس= و وقت الضحية، حلاة الكبش الاقرن كثر صوفه
و يا هلا

[العامري]

خشم الرعن

سعد العبود

بيض الله وجيهكم على هالسداسيات

وعز الله انكم ماقصرتوا

أردت الاستشهاد ببعض الابيات لتؤكد اعجابي

فاحترت فيها أيهما اختار

فكل بيت يقول ( الزين عندي)

وأصبحت مثل داب الجراد

ولا أريد أن أعيد كتابتها

فصح لسان خشم الرعن

وصح لسان ابن عبود

وواصلوا الله يعافيكم

[معدي المرقاب]

بسم الله الرحمن الرحيم


عميدنا خشم الرعن و سعد العبود
الله يعطيم العافيه على هذا الأبداع الرائع الذي يدل على روعة شعركم وما يحتويه من معاني صادقه و هادفه

بيض الله وجيهكم و لكم مني الف الف الف مليون تحيه


أخوكم معدي المرقاب

[ابودحيم]

الله الله

العميد و المراقب

يا سلام عليكم

سداسيات و لا اروع منها

الله يقويكم

تحياتي

[سعد العبود]

ابووليد الغالي:
أنا من يشكرك على طلبي لهذه المجاراة التي اعتز بأن أشاركك فيها
كعادتك تأتي بالجديد المفيد و أتمنى ان يكون لنا لقاء جديد ياخال ....

العامري:
لاهنت على مرورك الطيب دائماً كعادتك متابع وشاعر مبدع لك الشكر على هذه المداخلة اللطيفة .....

الأخ معدي المرقاب :
لاهنت يالغالي على هذا المرور العذب أشكرك على ما تقدم واشكرك على هذا المرور.....

ابودحيم :
مشكور على هذا المرور الطيب السداسيات والرباعيات والثنائيات لا تكتمل الا بمرور أمثالك يالغالي ....

[*سعود*]

ماشاء الله بارك الله فيكم ايها النجوم اللامعه في هذا المنتدى

شبه المنطفئ ولكن انتم النجوم والقمر الذي تضفون علينا النور
وبارك الله فيك اخي خشم الرعن والاخ سعد العبود

[hotmail]

الله الله
و الله يالحسوفة واصله حدها معي
ودي اني عشت معكم هالابيات
و لا ودي اني لقيته جاهزه و بقراطيسها

و يمال العافية با ابووليد و ياابويوسف
و كرروها لا هنتم يالنشامى

[الصييفي]

الأخوة الأعزاء:
"العامري"،

"معدي المرقاب"،

"أبو دحيّم"،

"سعود"،

"hotmail"،

نشكركم على مروركم و تشجيعكم
و نرجوا أن يستمر هذا التواصل إذ بدونه
يقل الحماس و تطفأ شموع الهمم.

الأخ سعد العبود:
حياك الله يبو يوسف، لكن ترى بذمتك ستة بيوت،
و الدَّين شين، خاصة أنك موسع الله عليك!.
لك كل تحية و تقدير.
و يا هلا

[محمد السعيدي]

بسم الله الرحمن الرحيم

ابو وليد , وابو يوسف : فكرة جديدة في فن المحاورة وتحتاج إلى نفس طويل وهذا ماينقصكم

أشكر لكم هذه الفكرة وهذه الأبيات السامية بمعنى الكلمة , ونتمنى أن نرى فكرة أخرى 0

[الصييفي]

الأخ الغالي: محمد السعيدي،
باسمي و باسم سعد العبود أشكرك على مرورك وكلماتك الرقيقة
وأبشر بالخير أنت و غيرك من الإخوان،
و أنت من ركائز هذا المنتدى
فلا تحرمنا من مشاركاتك.

و يا هلا

[ابومتعب]

ياسلام عليك ياخال انت وابويوسف

محاورة ولا اروع

واصلو لاهنتو وازهلو الصفوف

[الصييفي]

حياك الله يبو متعب، و شكرا على متابعتك
هذي الجولة إنتهت و الجايات كثار ، إن شاء الله.

و يا هلا