حياكم الله ياهل الشعرا (الدعوه عامه)

[سنايدي]

السلام عليكم ورحمه الله وبركاته
ترا الدعوه عامه والله يحييكم


وسامحوني اذا كان يبي يصير في المحاوره شد ترانا اخوان والله لا يجيب الزعل وهذه الي محليتها


سلام يا صفوة هل الطيب والجود=جيت ابقصيدي منهو الي تحدى؟
وانتم هل الطالات عمَان وجدود=وانتم ذهب براق ماينتصدى

[الصييفي]

مرحبا بك يا "سنايدي"، و مقدمة كلامك تخوِّف،
لكن قبلنا التحدي
و المسالة كلها سعة صدر بين
الربع و البنيخي.

إستلم يا "سنايدي":


هلا بمن دز التحية مع النود= "سنايدي"، كريم خال(ن) و جدّا
كان التحدي منهجه واضح حدود= فانا قبلته، و الطلب ما يردا

و يا هلا

[سنايدي]

خشم الرعن حياك الله ولي الشرف اني اتحاور معك
واكيد الي قلته في بدايه كلامي اقصد فيه ناس معينين ولا كنت اقصدك ....انت عميدنا وعلى العين والراس واعضاء المنتدى بعد
استلم


خشم الرعن حلحيل من ال مسعود=وليا حسبو عصمان الايدي يعدا
هذا كلامي ما يبي بصمت شهود=لو تمدحك كل العرب مايسدا

[الصييفي]

هلا بك يا"سنايدي"، و أرجو ألا أكون خربت خططك،
و العتب عليك اللي خليتها مفتوحة،
كان طلبت قبيلك، إن كان لك زعيمة.

إستلم لا عدمتك:


ما عنك زود، و سالم(ن) كل منقود= يا صاحب(ن) في قمة الطيب عدّى
هات العلوم بغير نقص(ن) و لا زود= منتب غريب، و جرِّتِكْ بالمَودّى

و يا هلا

[سنايدي]

بالعكس يا خشم الرعن لي الشرف اني اقابلك
استلم ستلم


ابسالك وش صار في وضعنا زود=عطني علوم(ن)وش حصل مستجدا
حنا نبي نفتح لنا باب مسدود=ابنشدك في حالنا الي تردا

[الصييفي]

أخوي "سنايدي"
الظاهر إن فينا "شعرة ذيب"!
وين الصفوف؟؟

إستلم لا هنت:


أنا احْسبنِّك جيت يا راعي الفود= و عندك خبر، واثركْ لمثلي تجدّى
اعلومنا زينة، و لا فيه مجهود= بعضه كِسلْ، و البعض ما عنه بُدَّا

و يا هلا

[العامري]

الله الله الله الله


خشم الرعن حلحيل من ال مسعود...وليا حسبـو عصمـان الايـدي يعـدا
هذا كلامي ما يبي بصمـت شهـود...لـو تمدحـك كــل الـعـرب مايـسـدا


سنايدي صح لسانك

كلامك في محله

وقواك الله

وياليتك حددت اللي تعنيهم عشان يقلطون







خشم الرعن

صح لسانك

مافيك الا العافية

بس الناس بأوقات اختبارات و لاهين شوي


لكن وصلتك الصفوف


عطونا عماركم بس



أنا احْسبنِّك جيت يا راعي الفود...و عندك خبر، واثركْ لمثلي تجدّى
اعلومنا زينة، و لا فيه مجهود...بعضه كِسلْ، و البعض ما عنه بُدَّا


كلام كلام

[علي العجاجي]

سنايدي

خالي خشم الرعن


بيض الله وجيهكم على المحاوره الطيبه وشدوا حيلكم حنا ووصلنا وازهلوا الصفوف

الليل الليل الليل الليل

[سنايدي]

العامري
حياك الله وصح بدنك وانشالله يحصلي الشرف واتحاور معك
الخال علي العجاجي
شرفني حضورك

خشم الرعن اوضاعنا كمسلمين لا والله ماتسر لاكن اوضاعنا حنا الحمدلله على الامن والامان

اوضاعنا شينه والاسباب مقرود=بوش المريكي دايم(ن)في تمدا
بين اليهود وبينه عهود وعهود=وحنا عرب ماعندنامن يصدا

[الصييفي]

الإخوة الشعار:

"العامري"،

و

علي العجاجي،

مشكورين على حضوركم ومسكتكم الصفوف
اللي كانت خاوية من قبلكم.
عانكم الله يالمدرسين و الطلاب.

الأخ "سنادي":
لا تشاءم ، وكل مايحصل لنا من عمايلنا:

إستلم يا الغالي:


أنا قصدت المنتدى و انت بسنود= مع السياسة يو حظك تردّى
وقت(ن) تغيَّر عقب "روزفلت" و "العود"= و حنا كمانا، و ركب الاعدا تعدّا

و يا هلا

[سنايدي]

الله الله الله الله
صح لسانك يا "خشم الرعن"
انا الله يستر ابي ادخل في السياسه شوي
وانا وطني 100/100 بس عارفين ان الشعار يقولون مالا يفعلون ....والله يعز اخوان نوره |266|


ياليت حشد جيوشنا جت من فود=كله لاجل صاحب سمو(ن)مفدى
هذا كلامي لاعلى شي مسنود=يالله سترك من عقاب(ن)يهدا

[تلعة الصرامه]

الله الله

صحة السنتكم والله اني متحير ماادري من امسك صفه

كل واحد يقول الزود عندي بالجزاله

ترانا متابعين

[ابودحيم]

الله الله الله الله

صح لسانك يالعميد
انتو و الشاعر سنايدي

و انا بصفك يالعميد و لا تهون يا سنايدي

قواكم الله

[سنايدي]

تلعة الصرامه
صح ابدانك ويشرفنا وجودك
ابو دحيم
صح ابدانك ويستاهل "خشم الرعن"
تو ما تحمسنا يا شباب ابطيتوا علينا لاكن انت معذور يابو دحيم الله يعينك على الاختبارات

[الصييفي]

وو . . . ووو . . . وووو . . . !

خذ الرد يا "سنايدي":


الجيش فيه الخير و الشر مردود= يَهْزِمْ عْدانــا، والبطيني يْبَدَّى
و ما دام هرجِك ماله اثبات و شهود= لا تامِن الاخطار ممّا يِنِدَّى

و يا هلا

[الصييفي]

الإخوة الأعزاء:

"تلعة الصرّامة"،
مرحبا بك، و المهم حضورك الذي سرنا.
.

.

"ابو دحيِّم"،

تسلم يا الغالي على حضورك و وقوفك بصفي
و تواجدكم هو بيت القصيد.

و يا هلا

[سنايدي]

الله الله الله
صح لسانك يا عميدنا
المثل يقول
اضرب على الكايد لا صرت بحلان على الولي وصل الرشا وانقطاعه
وانا الله يستر ابي اضرب على الكايد وهذا مهو معناته انكم ما تصفون معي يا شباب ترا اذا لا قدر الله صار شي انا الي يبي ياخذوني انتم ما لكم دخل |276|

استلم لا عدمتك يا "خشم الرعن" والله يستر


العسكري فينا على دخل محدود=وين الدراهم يا عميلي تودى
خرجيت(ن)يكفي لها فرد ياكود=يا كيف نهزم خصمنا الي يضدى

[الصييفي]

الأخ "سنايدي"،

"أبشر بألف سلامة(ن) يا مربعُ"

إستلم:



العسكري عايشْ و صامدْ كما الطودْ= يحمي ذمار الدين من كلّ نِدّا
منتب موكّل عن عْبادِ اللهْ تْذودْ= و لا لك خَصِمْ، واللِّي عطى العِلْمْ، ردّا

و يا هلا

[سنايدي]

"خشم الرعن"
ارجو اني ما ثقلت عليك
وكان لي الشرف اني اتحاور معك
وانشالله نتقابل مره اخرى على خير انشالله
وانا راح اغيب فتره بسيطه عن المنتدى
وانشالله لنا عوده
واشكركم
تحياتي
سنايدي

[الصييفي]

الأخ "سنايدي":

لك كل الشكر بعد الله على قبولي في هذه
المحاورة التي استمتعت بها .
و أشكر كل من مسك الصفوف
أو تصفح.
و على الخير نلتقي


و يا هلا

[سعد العبود]

حقيقة محاورة جميلة بل رائعة

اشكركم على هذا الأداء الرائع

وارجوا المعذرة على التأخر بالمشاركة

[الصييفي]

مرحبا بك يبو يوسف،
باسمي و باسم الأخ "سنايدي"
لك جزيل الشكر، و لا غاب من جا.

و يا هلا